નવી દિલ્હીઃ જીએસટી કાઉન્સિલની 34મી બેઠક મંગળવારે થશે. તેમાં રિયલ એસ્ટેટ સેકટર માટે જીએસટી રેટમાં કાપ લાગુ કરવાની રીતો સહિતની વિવિધ બાબતો પર ચર્ચા થઈ શકે છે. સૂત્રોએ સોમવારે આ માહિતી આપી છે. તેમણે કહ્યું કે ચૂંટણીની આચાર સહિતા લાગૂ થઈ ચૂકી છે. આ કારણે જીએસટી રેટ નક્કી કરવા સાથે જોડાયેલો કોઈ પણ મુદ્દો બેઠકના એજન્ડામાં નથી.
કાઉન્સિલની 24 ફેબ્રુઆરીની બેઠકમાં અન્ડર કન્સ્ટ્રકશન ફલેટ અને સસ્તા ઘરો પર જીએસટી રેટને ઘટાડીને ક્રમશઃ 5 ટકા અને 1 ટકા કરવામાં આવ્યો હતો. તેના નવા દરો એક એપ્રિલથી લાગુ થશે. હાલ અન્ડર કન્સ્ટ્રક્શન પ્રોપર્ટી રેડી-ટૂ-મૂવ ફલેટના પેમેન્ટ પર ઈનપુટ ટેક્સ ક્રેડિટની સાથે 12 ટકા જીએસટી લાગે છે. સસ્તા મકાનો પર જીએસટી દર 8 ટકા છે.
જીએસટી કાઉન્સિલ સાથે જોડાયેલા સૂત્રોએ કહ્યું કે આ બેઠકમાં રાજયોના રેવન્યુ ડિપાર્ટમેન્ટની સાથે નિર્માણધીન ઘરો પર જીએસટીમાં કાપનો ફાયદો ઘર ખરીદનારાઓને આપવાની રૂપરેખા નક્કી કરવામાં આવશે. તેનો હેતું છે કે ખરીદનારાઓની સાથે કોઈ છેતરપિંડી ન થાય. એ પણ જોવામાં આવશે કે ઈનપુટ ક્રેડિટ ખત્મ થઈ ગયા બાદ બિલ્ડર ફ્લેટનો ભાવ ન વધારે.