સુરતઃ આજે ફાયર વિભાગ દ્વારા ફાયરની અપૂરતી સુવિધાને લઈને અલગ અલગ વિસ્તારમાં સીલ મારવાની કામગીરી હાથ ધરવામાં આવી છે. જેમાં મોટા વરાછા ખાતે ફાયર વિભાગની બેદરકારી સામે આવી છે. મોટા વરાછામાં ફાયર વિભાગે ઈન્સ્યોરન્સની ઓફિસમાં સીલ મારી દીધું હતું. જેથી ઓફિસમાં હાજર એક કર્મચારી ફસાઈ ગયો હતો.
મોટા વરાછા ખાતે આવેલા ધારા આક્રેડ કોમ્પલેક્ષની ઓફિસને ફાયર વિભાગ દ્વારા સીલ મારવામાં આવ્યું હતું. જેમાં 305 નંબરમાં ઈન્સ્યોરન્સની ઓફિસ આવેલી છે. ફાયર વિભાગે ઓફિસનું શટર બંધ હોવાથી બહારથી જ સીલ મારી દીધું હતું. ઓફિસમાં હાજર અઝર નામનો કર્મચારી ઓફિસમાં જ ફસાઈ ગયો હતો. ફાયર વિભાગ સીલ મારી જતું રહ્યું હતું. જોકે, ઓફિસમાં ફસાયેલા યુવાને બુમાબુમ કરી હતી. જેથી કોમ્પલેક્ષના લોકો દોડી આવ્યા હતા. ત્યારબાદ ફાયર વિભાગે સીલ તોડી યુવકને બહાર કાઢ્યો હતો. અને ફરી સીલ મારી દીધું હતું.