સાયબર ગઠિયા દ્વારા વિડિયો કોલ કરીને નિર્દોષ નાગરિકોને ડિજિટલ એરેસ્ટ કરવાનું કહીને લાખો રૃપિયા પડાવી લેવાના કિસ્સા વધી રહ્યા છે. તાજેતરમાં કાલુપુરની યુવતી ડિજિટલ એરેસ્ટનો ભોગ બની છે. જેમાં દિલ્હી ક્રાઇમબ્રાંચ અને સીબીઆઇ અધિકારીની ઓળખ આપીને સાયબર ગઠિયાઓએ તમારા બેન્ક એકાઉન્ટમાં ડ્રગ્સના લે-વેચના ટ્રાન્ઝેક્શન થયા છે કહીને ડરાવી ધમકાવી હતી અને બનાવટી એરેસ્ટ વોરંટ અને નોટિસ વોટસએપ ઉપર મોકલ્યા બાદ બેન્ક એકાઉન્ટની વિગતો મંગાવીને રૃા. ૧.૧૬ લાખ પડાવ્યા હતા. આ બનાવ અંગે કાલુપુર પોલીસે ફરિયાદ ગુનો નોંધી વધુ તપાસ હાથ ધરી છે.
વિડિયો કોલ કરી પોલીસના ડ્રેસ પહેરેલી વ્યકિતએ અધિકારી હોવાની ઓળખ આપી ડરાવી ધમકાવી બેન્કની વિગતો મંગાવીને ઓન લાઇન રૃપિયા લઇ લીધા
કાલુપુરમાં રહેતી ૪૫ વર્ષની મહિલાએ કાલુપુર પોલીસ સ્ટેશનમાં દિલ્હી ક્રાઇમબ્રાંચ અધિકારી તથા સુનિલકુમાર ન્યૂ દિલ્હી વસંતકુંજ પોલીસ સ્ટેશન અધિકારી અને અનિલ યાદવ સીબીઆઇ અધિકારીની ઓળખ આપનારા સામે ફરિયાદ નોંધાવી છે કે તા. ૧૩ નવેમ્બર ૨૦૨૪માં મહિલા ઘરે હતી ત્યારે અજાણ્યા નંબર પરથી ફોન આવ્યો હતો અને પોતે દિલ્હી ક્રાઇમ બ્રાન્ચમાંથી બોલે છે અને તમારા બેન્ક એકાઉન્ટમાં ડ્રગ્સની લે-વેચના ટ્રાન્ઝેક્શન મળ્યા છે અને તમારા ૨૦ ડેબિટકાર્ડ તથા પાસપોર્ટ જપ્ત કર્યા છે કહેતા યુવતી ડરી ગઇ હતી. થોડીવારમાં અજાણ્યા નંબર ઉપરથી વોટ્સએપ વિડીયો કોલ આવ્યો હતો. તેણે મહિલાને ડરાવીને આધારકાર્ડ મંગાવ્યા બાદ મહિલાને એરેસ્ટ વોરંટ અને નોટિસ મોકલી હતી. ગઠિયાઓએ સીબીઆઈના અધિકારીની ઓળખ આપીને તમને ડિજિટલ એરેસ્ટ કરવામાં આવે છે કહીને ઘર લોક કરાવ્યું હતું અને મોબાઈલ સામે મુકાવ્યો હતો. ત્યારબાદ મહિલાને તેમના બેંકના ખાતા વિશેની પૂછપરછ કરી હતી. બાદમાં આરોપીએ તમારું બેંક એકાઉન્ટ તપાસ માટે આરબીઆઈમાં વેરિફિકેશન માટે મોકલવાનું છે. જેના સિક્યુરિટી ચાર્જ પેટે બેંકના ખાતામાં રહેલા પૈસા હાલ ભરવા પડશે જે વેરિફિકેશન બાદ રિફંડ મળી જશે કહી મહિલાના ખાતામાંથી બે ટ્રાન્જેક્શન દ્વારા એક લાખ રૃપિયા પડાવ્યા હતા. ત્યારબાદ બીજા દિવસે ફરીથી અજાણ્યા નંબર પરથી વિડીયો કોલ આવ્યો હતો અને બીજી નોટિસ મોકલી હતી. જેમાં બીજા ૧૬,૦૦૦ રૃપિયા ભરવાનું કહેતા મહિલાએ ૧૬,૦૦૦ રૃપિયા ભર્યા હતા. મહિલાએ વેરિફિકેશન બાદ તેમના બેંકમાં ભરેલા પૈસા પરત માંગવા વોટસએપ પર કોલ કર્યો ત્યારે સામેવાળી વ્યક્તિએ ફોન ઉઠાવ્યો ન હતો. જેથી મહિલાને પોતાની સાથે ઠગાઇ થઇ હોવાની જાણ થઇ હતી.
