મોંઘવારીમાં સતત વધારો થઇ રહ્યો છે ત્યારે NSUI દ્વારા વધતી જતી મોંઘવારીનું બેસણું યોજવામાં આવ્યું હતું. NSUIના કાર્યકરો મોંઘવારીનું બેનર બનાવીને રસ્તા પર બેઠા હતા અને મોંઘવારીના વિરોધમાં નારા લગાવીને મોંઘવારીનો વિરોધ કરી રહ્યા હતા, ત્યારે પોલીસે તમામ કાર્યકરોની અટકાયત કરી હતી.
પરવાનગી વગર કાર્યક્રમ યોજતા અટકાયત
ખોખરા સર્કલ પાસે NSUI દ્વારા આજે મોંઘવારીના બેસણાનો કાર્યક્રમ રાખવામાં આવ્યો હતો. NSUIના આગેવાનો અને કાર્યકરોએ રોડ પર બેસીને પેટ્રોલ,ડીઝલ,ગેસ અને તેલના ભાવમાં થઇ રહેલ વધારાનો વિરોધ કર્યો હતો. રસ્તા પર પાથરણા પાથરીને કાર્યકરોએ નારા પણ લગાવ્યા હતા.જાહેર રોડ પર કાર્યક્રમ યોજવામાં આવ્યો હતો પરંતુ પરવાનગી ના હોવાને કારણે પોલીસે તમામ કાર્યકરોની અટકાયત કરી હતી.
જીવન જરૂરી ચીજવસ્તુઓ મોંઘી થઈ
આ અંગે NSUIના ગૌરાંગ મકવાણાએ જણાવ્યું હતું કે, છેલ્લા 6 વર્ષમાં મોંઘવારી આસમાને પહોચી છે. પેટ્રોલના ભાવ 10 મહિનામાં જ 25 રૂપિયા વધ્યા છે, ડીઝલના ભાવમાં પણ 25 રૂપિયા વધ્યા છે, ગેસ સિલિન્ડરના ભાવમાં 200 રૂપિયા વધ્યા અને CNGમાં પણ 10 રૂપિયા વધ્યા છે. આમ જીવન જરૂરિયાતની તમામ વસ્તુઓના ભાવમાં ધરખમ વધારો થયો છે, જેથી અમે આજે રોડ પર મોંઘવારીનું બેસણું યોજીને વિરોધ કરી રહ્યા છે.
