કોંગ્રેસની એક મહત્વપૂર્ણ સમિતિએ ભારતમાં યુએસ એમ્બેસેડર તરીકે લોસ એન્જલસના મેયર એરિક એમ ગારસેટી ની નોમિનેશનને મંજૂરી આપી છે. ગારસેટી ઉપરાંત, બુધવારે સેનેટની શક્તિશાળી ફોરેન રિલેશન્સ કમિટીએ 11 અન્ય રાજદૂતોના નામાંકનને મંજૂરી આપી હતી. જેમાં જર્મનીમાં યુએસ એમ્બેસેડર તરીકે એમી ગુટમેન,પાકિસ્તાનમાં ડોનાલ્ડ આર્મીન બ્લોમ અને હોલી સીમાં જો ડોનેલીનું નામ સામેલ છે. હવે આ નામોને અંતિમ મંજૂરી માટે સેનેટના ટેબલ પર મૂકવામાં આવશે.
વિશ્વભરમાં તેમની સામે ઘણા પડકારો
સેનેટ વિદેશ રિલેશન કમિટીના ચેરમેન સેનેટર બોબ મેનેન્ડેઝે નારાજગી વ્યક્ત કરી હતી કે સમિતિ સમક્ષ 55 નોમિનેશન હજુ બાકી છે અને વિશ્વભરમાં તેમની સામે ઘણા પડકારો છે. “જેમ કે મેં આ સમિતિ અને સેનેટ સમક્ષ ઘણી વખત કહ્યું છે કે, લાંબા સમય સુધી હોદ્દા ખાલી રાખવા તે અમારા હિતમાં નથી,” તેમણે કહ્યું. બુધવારે સુનાવણીની અધ્યક્ષતા ન્યૂ જર્સીના સેનેટર સેન મેનેન્ડેઝ દ્વારા કરવામાં આવી હતી. સમિતિ ડેમોક્રેટ અને રિપબ્લિકન સેનેટરોની સમાન ભાગીદારી સાથે 22 સેનેટરોની બનેલી છે. પ્રમુખ જો બાઈડન 9 જુલાઈના રોજ ગાર્સેટીના નામાંકનની જાહેરાત કરી હતી.
એરિક ગારસેટી કોણ છે
એરિક એમ. ગારસેટી 2013 થી લોસ એન્જલસના 42મા મેયર છે. તેઓ 12 વર્ષથી સિટી કાઉન્સિલના સભ્ય પણ છે. આમાં, તેઓ કાઉન્સિલના અધ્યક્ષ તરીકે છ વખત સેવા આપી ચૂક્યા છે. 50 વર્ષીય ગારસેટી 2013માં લોસ એન્જલસના મેયર તરીકે ચૂંટાયા હતા અને 2017માં આ પદ માટે ફરીથી ચૂંટાયા હતા. તે શહેરના પ્રથમ ચૂંટાયેલા યહૂદી મેયર છે અને તેના સતત બીજા મેક્સિકન-અમેરિકન મેયર છે. મેયરની અધિકૃત વેબસાઈટ મુજબ, લોસ એન્જલસ શહેરના વૈશ્વિક સંબંધોને વિસ્તારવા માટે આંતરરાષ્ટ્રીય બાબતો માટે તેમને લોસ એન્જલસના પ્રથમ ડેપ્યુટી મેયર તરીકે નિયુક્ત કરવામાં આવ્યા હતા.