રાજકોટ મહાનગરપાલિકાની દબાણ હટાવ શાખાના ઇન્સ્પેક્ટર તરીકે ફરજ બજાવતા નિવૃત્ત આર્મીમેન રાજદીપસિંહ રાણા સહિતનો સ્ટાફ બુધવારે સાંજે નાનામવા સર્કલથી શાસ્ત્રીનગર રોડ પર લારીવાળાઓએ કરેલું દબાણ હટાવવા ગયા હતા. ત્યારે રિયાઝ નામના લારીધારક ફેરિયાએ રાજદીપસિંહ પર છરી હુમલો કર્યો હતો અને તેનો હાથ ભાંગી નાખ્યો હતો. માથાભારે આ શખસની દાદાગીરીથી પોલીસ પણ લાચાર બની મૂકપ્રેક્ષક બનીને તમાશો જોઈ રહી હતી. નવાઝે પોલીસ પર તરબૂચ, વજનિયાં અને છરીથી હુમલો કર્યો એનો લાઈવ વિડિયો સામે આવ્યો છે. માથાભારે રિયાઝે અડધો કલાક સુધી આતંક મચાવ્યો હતો છતાં અન્ય સ્ટાફે કાર્યવાહીને બદલે તમાશો નિહાળ્યો હતો. અંતે, પોલીસે છરી સાથે એ શખસને ઝડપી સરભરા કરી કાયદાનું ભાન કરાવ્યું હતું.
તાલુકા પોલીસનો કાફલો આવતાં જ રિયાઝ ભાગીને પાર્ટી-પ્લોટની ઓરડીમાં છુપાઈ ગયો
આ અંગે જાણ કરાતાં તાલુકા પોલીસનો કાફલો દોડી ગયો હતો. પોલીસને જોતાં જ રિયાઝ ભાગ્યો હતો, પોલીસે તેનો પીછો કરતાં રિયાઝ નજીકમાં આવેલા પાર્ટી-પ્લોટમાં છુપાઇ ગયો હતો, જોકે પોલીસે તેનો પીછો કરી ત્યાંથી દબોચી લીધો હતો. પાર્ટી-પ્લોટમાંથી રિયાઝને બહાર લવાતાં જ લોકોએ પોલીસ સકંજામાં રહેલા રિયાઝને ધોલધપાટ કરી રોષ ઠાલવ્યો હતો. હુમલામાં ઘવાયેલા ઇન્સ્પેક્ટર રાણાને હોસ્પિટલમાં ખસેડવામાં આવ્યા હતા.
આરોપીનો આક્ષેપ, હપતો આપીએ છીએ છતાં હેરાન કરાય છે
મનપાની ટીમે લારી જપ્ત કરવાનો પ્રયાસ કરતાં જ લારી માલિક રિયાઝ ઉશ્કેરાયો હતો અને તેણે જાહેરમાં દબાણ હટાવ ટીમ પર આક્ષેપ કરતાં કહ્યું હતું કે આ લોકોને નિયમિત હપતો આપીએ છીએ છતાં ચોથી વખત લારી જપ્ત કરવા આવ્યા છે.
ધમકાવ્યા, ગાળો ભાંડી છતાં ત્રણ-ત્રણ અધિકારી ચૂપ રહ્યા, તમાશો જોતા રહ્યા, એની પાછળનું કારણ શું?
એક યુવાન જાહેર અધિકારીઓને ધમકાવે છે, ગાળો ભાંડે છે, રોડ પર રીતસર આતંક મચાવે છે છતાં આ અધિકારીઓ તેની સામે દંડો ઉગામવાને બદલે ચૂપચાપ બધું સાંભળ્યા કરે છે. એક હરફ સુધ્ધાં ઉચ્ચારતા નથી. એની પાછળ એવું તો શું કારણ છે? કે પછી કાયરતા છે. લોકો પોતાની જાતને આમાં કેટલી સલામત માને?
