અમદાવાદ : વિડીયો : વટવા-વિંઝોલ રેલવે-ફાટક પાસે મોડી રાત્રે કેમિકલ કંપનીઓમાં ભીષણ આગ : ત્રણેક કલાકની જહેમત બાદ આગ પર કાબૂ.

0
17

શહેરમાં આગ લાગવાની ઘટનાઓનો સિલસિલો યથાવત્ છે. મોડી રાત્રે 1 વાગ્યા આસપાસ વટવા-વિંઝોલ રેલવે-ફાટક પાસે આવેલી માતંગી એન્ટરપ્રાઈઝ અને જક્ષય નામની કેમિકલ કંપનીમાં ભીષણ આગ ફાટી નીકળી હતી, જેમાં આસપાસની 4 મળી કુલ 6 જેટલી કંપનીમાં આગ ફેલાઈ હતી. ફાયરબ્રિગેડે બ્રિગેડ કોલ જાહેર કરી 40 ફાયર ટેન્કર અને 100 જેટલા જવાનોએ આગને કાબૂમાં લેવાના પ્રયત્ન કર્યાં હતાં અને ત્રણેક કલાકની જહેમત બાદ આગ પર કાબૂ મેળવી લેવામાં આવતાં સ્થાનિકોએ હાશકારો અનુભવ્યો હતો. જોકે આગની ઘટનામાં હજુ સુધી જાનહાનિના કોઇ અહેવાલ પ્રાપ્ત થયા નથી.

અમદાવાદ : વિડીયો : વટવા : કેમિકલ કંપનીઓમાં ભીષણ આગ.

ઇસનપુર સુધી ધડાકા સંભળાયા

કંપનીઓમાં લાગેલી આગ એટલી વિકરાળ હતી કે દૂરથી આકાશમાં આગની જ્વાળાઓ દેખાઇ રહી હતી. આગને કારણે કેમિકલના જથ્થામાં થયેલા ધડાકા ઇસનપુર સુધી સંભળાયા હતા. ધડાકાઓ સાથે આગ લાગતાં વિંઝોલ અને વટવાના નાગરિકો ભરઊંઘમાંથી જાગી ગયા હતા. આગને કારણે લોકોનાં ટોળાં ઊમટ્યાં હતાં. ઘટનાની જાણ થતાં વટવા પોલીસનો કાફલો દોડી આવ્યો હતો.

ગત ઓક્ટોબર મહિનામાં ફાયર સેફ્ટીને લઈ સરકારે મોટો નિર્ણય લીધો હતો

રાજ્યમાં ફાયર સેફ્ટીના કડક અમલથી લોકોનાં જાન-માલ-મિલકતને આગથી સંરક્ષણ અપાવવા માટે મુખ્યમંત્રી વિજય રૂપાણી દ્વારા ગત ઓક્ટોબરમાં જ એક મહત્ત્વપૂર્ણ નિર્ણય લેવામાં આવ્યો હતો. રાજ્યમાં દરેક હાઇ રાઇઝડ બિલ્ડિંગ, ઊંચાં મકાનો, વાણિજ્ય સંકુલ, સ્કૂલ, કોલેજ-હોસ્પિટલ્સ, ઔદ્યોગિક એકમો માટે ફાયર સેફટીનું એન.ઓ.સી. મેળવવાનું અને દર છ મહિને એનું રિન્યુઅલ ફરજિયાત કરવામાં આવ્યું છે. રાજ્ય સરકાર આ હેતુસર પ્રાઇવેટ યુવા ઇજનેરોને જરૂરી તાલીમ બાદ ફાયર સેફ્ટી ઓફિસર તરીકે પ્રેક્ટિસ કરવા પરવાનગી આપશે. આવા ફાયર સેફ્ટી ઓફિસર પાસેથી દરેક મકાનમાલિક, કબજેદાર, ફેક્ટરીધારકે એન.ઓ.સી. મેળવવાનું અને દર છ મહિને એને રિન્યુ કરાવવું પડશે. આ માટે ખાનગી યુવા એન્જિનિયર્સને સરકાર નિર્દિષ્ટ તાલીમ બાદ ફાયર સેફ્ટી ઓફિસર તરીકે પ્રેક્ટિસ કરવા મંજૂરી આપશે.

સરકારના કડક નિર્ણય બાદ પણ અધિકારીઓની બેદરકારી, સંચાલકો સાથે સાઠગાંઠની ચર્ચા

નારોલ, પીપળજ, વટવા જીઆઇડીસી, નારોલ જીઆઇડીસી જેવા વિસ્તારમાં દર મહિને મોટી આગ લાગવી એ રુટિન બાબત હોય એમ દર વર્ષે વીમો પાકવાના સમયમાં આગ લગાડવામાં આવતી હોવાનું ચર્ચામાં હોય છે અને તંત્રના અધિકારીઓ પણ આ બાબત સારી રીતે જાણે છે છતાં ચોકકસ કયા કારણસર આજદિન સુધી કોઈની જવાબદારી નકકી કરીને કાર્યવાહી કે સજા થતી નથી. દરેક વિભાગ જેવા કે રોડ એન્ડ બિલ્ડિંગ, ફાયર, ફેકટરી ઇન્સ્પેક્ટર, એસ્ટેટ વિભાગ વગેરે એકબીજા પર ખો આપી દેતા હોય છે. એસ્ટેટના અધિકારીઓની જવાબદારી સ્થળ તપાસ કરી વધારાનું બાંધકામ થયું છે કે કેમ? એ તપાસવાની હોય છે એ કામગીરી થતી નથી, જેથી આવા વિસ્તાર-વ્યાપ વધતો રહે છે. મોટી મોટી કંપનીઓમાં આગના બનાવો બને છે. ફાયર અધિકારીઓ દ્વારા નિયમિત કયા દબાણ હેઠળ ફાયર એન.ઓ.સી. કે ફાયર સેફટી અંગે ઈન્સ્પેકશન થતું નથી કે પછી કે કંપનીના સંચાલકો સાથે સાઠગાંઠ છે એવી ચર્ચા ચાલતી હોય છે.

LEAVE A REPLY

Please enter your comment!
Please enter your name here