ભારતમાં ચોમાસું આવી ગયું છે. સ્થિતિ એ છે કે દેશના અનેક ભાગોમાં મુશળધાર વરસાદ પડી રહ્યો છે જેના કારણે સામાન્ય જનજીવન ખોરવાઈ ગયું છે. આવી સ્થિતિમાં વાહન ચલાવવું ઘણું મુશ્કેલ બની જાય છે. વાહનચાલકોએ નોંધ લેવી જોઈએ કે વરસાદની ઋતુમાં માર્ગ અકસ્માતમાં વધારો થાય છે. અને જો તમે વરસાદમાં તમારી બાઇક ચલાવતા હોવ, તો ભીના રસ્તાઓ તેમજ ઓછી વિઝિબિલિટીનો સામનો કરવા માટે તૈયાર રહેવાથી ઘણી મદદ મળશે.
બાઈક અને સ્કૂટર સવારોને વરસાદની મોસમમાં સૌથી વધુ મુશ્કેલીનો સામનો કરવો પડે છે. રસ્તાઓ લપસણો બની ગયા છે જેના કારણે માર્ગ અકસ્માતના બનાવો વધી રહ્યા છે. ઘણી વખત નાની ભૂલો પણ મોટા અકસ્માતો તરફ દોરી જાય છે. અહીં અમે તમને વરસાદની મોસમમાં રસ્તા પર તમારી સુરક્ષાને સુનિશ્ચિત કરવા માટે કેટલીક મહત્વપૂર્ણ ટીપ્સ જણાવી રહ્યા છીએ.
વરસાદની મોસમમાં ઝડપી વાહન ચલાવશો નહીં. કારણ કે વરસાદમાં, રસ્તા પર ટ્રેક્શન ઓછું થઈ જાય છે, જેના કારણે વાહન પર તમારું નિયંત્રણ પણ ઓછું થઈ જાય છે. પછી તે મોટરસાઇકલ હોય કે સ્કૂટર. એટલું જ નહીં, જો ડ્રાઇવિંગ કરતી વખતે અચાનક બ્રેક લગાવવામાં આવે તો બ્રેક્સ પણ અસરકારક રીતે લાગતી નથી. ભારે વરસાદમાં વિઝિબિલિટી પણ ઘટી જાય છે. તેથી, વરસાદ દરમિયાન, તમારા ટુ-વ્હીલરની સ્પીડ 40 કિલોમીટર પ્રતિ કલાકથી ઓછી રાખો.
વરસાદની સિઝનમાં અનેક જગ્યાએ રસ્તાઓ પર પાણી ભરાઈ જાય છે. જેના કારણે ઘણી વખત રસ્તાઓ પર મોટા ખાડાઓ દેખાતા નથી. આ સમસ્યા રાત્રે વધુ થાય છે. તેથી જ્યાં પાણી હોય ત્યાં વાહન ચલાવશો નહીં. આટલું જ નહીં, જો વધારે પાણી ભરેલું હોય તો એક્ઝોસ્ટમાં પાણી આવવાનું જોખમ રહેલું છે, જેના કારણે વાહન બંધ થઈ શકે છે.
આજકાલ માર્કેટમાં ફિંગર વાઇપર્સ આવવા લાગ્યા છે જે હેલ્મેટના વિઝર પર પાણીના ટીપાંને સાફ કરવામાં મદદ કરે છે. ફિંગર વાઇપર્સ બહુ મોંઘા નથી હોતા. સામાન્ય રીતે તેમની કિંમત 100 રૂપિયાથી શરૂ થાય છે. વરસાદમાં હેલ્મેટના વિઝર (કાચ) પર પડતા ટીપાંને જોવામાં તકલીફ પડે છે. બીજું કંઈ દેખાતું નથી જેના કારણે અકસ્માતની શક્યતા વધી જાય છે.
હેલ્મેટ વિના બાઇક કે સ્કૂટર ન ચલાવો, પછી ભલે તમે નજીકમાં ક્યાંક જતા હોવ. ખાસ કરીને વરસાદના દિવસોમાં હેલ્મેટ પહેરો. વરસાદ દરમિયાન, હેલ્મેટના વિઝરને કારણે, વરસાદના ટીપાં આંખો પર પડતા નથી, જેનાથી બાઇક ચલાવવું સરળ બને છે. આ ઉપરાંત હેલ્મેટ પણ તમને સુરક્ષિત રાખે છે. હેલ્મેટ ન પહેરવાથી ન માત્ર દંડ લાગે છે, પરંતુ તે વ્યક્તિના જીવન માટે જોખમ પણ છે.
વરસાદ દરમિયાન, આગળ જતા વાહનથી હંમેશા યોગ્ય અંતર જાળવો. ખાસ કરીને એવા વાહનો જે ઓવરલોડિંગ સાથે દોડી રહ્યા છે. વરસાદમાં રસ્તા પર ટ્રેક્શન ઓછું હોય છે જેના કારણે યોગ્ય સમયે બ્રેક નથી લાગતી. આ સિવાય વાહનની હેડલાઇટ હંમેશા ચાલુ રાખો.
