દેશમાં છેલ્લા કેટલાક સમયથી સામૂહિક આપઘાતના બનાવ વધી રહ્યાં છે જેમાં હવે વધુ એકનો ઉમેરો થયો છે. એકીસાથે 4 લોકોએ સાથે મળીને ગળેફાંસો ખાઈ લીધો હતો. તમિલનાડુની રાજધાની ચેન્નઈમાં એક ડોક્ટરે તેની વકીલ પત્ની અને બે મોટા બાળકો સાથે ગળેફાંસો ખાઈને આપઘાત કરી લેતાં ચકચાર મચી હતી.
ચેન્નાઈના અન્ના નગરમાં આજે સવારે તેમના ઘરે ચાર જણના એક પરિવારના મૃતદેહ મળી આવ્યા – એક ડૉક્ટર, તેમની પત્ની અને બે પુત્રો. પોલીસને શંકા પૈસાની તંગી અને ભારે દેવાને કારણે તેમણે સામૂહિક આપઘાત કર્યો હતો. સોનોલોજિસ્ટ ડૉ. બાલામુરુગન, તેમની વકીલ પત્ની સુમથી અને તેમના પુત્રો, NEET ના ઉમેદવાર જસવંત કુમાર અને ધોરણ 11 ના વિદ્યાર્થી લિંગેશ કુમાર, બે રૂમમાં લટકતા મળી આવ્યા હતા. શહેરમાં અનેક અલ્ટ્રાસાઉન્ડ સેન્ટર ચલાવતા ડૉ. બાલામુરુગન કથિત રીતે મોટા દેવામાં ડૂબી ગયા હતા.
આજે સવારે, જ્યારે ડૉક્ટરનો ડ્રાઇવર ઘરે પહોંચ્યો, ત્યારે કોઈએ જવાબ ન આપતાં તેને કંઈક ખોટું થયું હોવાની શંકા ગઈ. તે પોલીસ પાસે ગયો, જેને 52 વર્ષીય બાલામુરુગન, 47 વર્ષીય તેમની પત્ની સુમથી અને તેમના પુત્રોના મૃતદેહ મળ્યા હતા.એક પોલીસ અધિકારીએ કહ્યું કે અમને શંકા છે કે તેમણે આત્મહત્યા કરી છે. તેઓ દેવામાં ડૂબેલા હતા. અમે તપાસ કરી રહ્યા છીએ. અત્યાર સુધી કોઈ તરફથી ઔપચારિક ફરિયાદ મળી નથી. હજુ સુધી એ સ્પષ્ટ નથી કે પરિવારે કોઈ સુસાઈડ નોટ છોડી હતી કે પછી તેઓ પૈસા આપનારાઓના દબાણ હેઠળ હતા.
