ભારત 2-1થી સીરિઝ જીત્યું : ઓસ્ટ્રેલિયાએ 12 રને મેચ જીતી : 2020 માં ભારત પહેલીવાર T-20માં હાર્યું, ભારતની 9 મેચની વિનિંગ સ્ટ્રીક તોડી.

0
0

ઓસ્ટ્રેલિયા ત્રણ T-20 સીરિઝની અંતિમ મેચમાં સિડની ખાતે ભારતને 12 રને હરાવ્યું છે. 187 રનનો પીછો કરતા ટીમ ઇન્ડિયા 20 ઓવરમાં 7 વિકેટે 174 રન જ કરી શકી હતી. કપ્તાન વિરાટ કોહલીની 85 રનની ઇનિંગ્સ પાણીમાં ગઈ. ભારત ભલે વ્હાઇટવોશ ન કરી શક્યું પરંતુ વિરાટ સેનાએ શ્રેણી 2-1થી જીતી છે.

મેચમાં ત્રણ વિકેટ ઝડપનાર લેગ સ્પિનર મિચેલ સ્વેપ્સનને પ્લેયર ઓફ ધ મેચનો એવોર્ડ મળ્યો હતો. જ્યારે, હાર્દિક પંડ્યાને પ્લેયર ઓફ ધ સીરિઝનો એવોર્ડ મળ્યો. તેણે આ સીરિઝમાં અનુક્રમે 16, 42* અને 20 રન કર્યા.

2020માં ભારત પહેલીવાર T-20 મેચ હાર્યું, 9 મેચથી અપરાજિત હતું

આ વર્ષે ભારત આ મેચ સહિત કુલ 12 T-20 રમ્યું. તેમાંથી 10 જીત્યું, 1 હાર્યું અને 1 મેચમાં રિઝલ્ટ ન આવ્યું. ભારત છેલ્લી 9 મેચથી T-20માં અપરાજિત હતું. આ મેચ ગુમાવતા જ ભારતની 9 મેચની વિનિંગ સ્ટ્રીક પણ તૂટી ગઈ છે.

કોહલીની T-20માં 25મી ફિફટી

વિરાટ કોહલીએ પોતાના T-20 કરિયરની 25મી ફિફટી ફટકારતા 61 બોલમાં 4 ફોર અને 3 સિક્સની મદદથી 85 રન કર્યા હતા. તે એન્ડ્રુ ટાઈની બોલિંગમાં કવર્સ પર સેમ્સના હાથે કેચ આઉટ થયો હતો. ઓસ્ટ્રેલિયા માટે મિચેલ સ્વેપ્સને 3 વિકેટ, જ્યારે એન્ડ્રુ ટાઈ, ગ્લેન મેક્સવેલ, સીન એબોટ અને એડમ ઝામ્પાએ 1-1 વિકેટ લીધી.

ભારત 12 વર્ષથી ઓસ્ટ્રેલિયામાં T-20 સિરીઝ હાર્યું નથી

ઓસ્ટ્રેલિયામાં ટીમ ઇન્ડિયાનો T-20 રેકોર્ડ ઘણો સારો રહ્યો છે. છેલ્લાં 12 વર્ષથી ટીમ ઇન્ડિયા અહીં કોઈ બાઈલેટરલ સિરીઝ હારી નથી. આ પહેલાં ભારતીય ટીમે ફેબ્રુઆરી 2008માં ઓસ્ટ્રેલિયા સામે તેના ઘરઆંગણે T-20 સિરીઝમાં હારનો સામનો કરવો પડ્યો હતો.

સેમસન અને ઐયરે નિરાશ કર્યા

સંજુ સેમસને ફરી એકવાર બેટથી નિરાશ કર્યા છે. તે સ્વેપ્સનની બોલિંગમાં લોન્ગ-ઓન પર સ્મિથના હાથે કેચ આઉટ થયો હતો. તેણે 9 બોલમાં 10 રન કર્યા હતા. તે પછી શ્રેયસ ઐયર શૂન્ય રને સ્વેપ્સનની બોલિંગમાં LBW થયો હતો.

ધવન શરૂઆતને મોટા સ્કોરમાં કન્વર્ટ ન કરી શક્યો

ઓપનર શિખર ધવન સ્વેપ્સનની બોલિંગમાં ડીપમાં સેમ્સના હાથે કેચ આઉટ થયો હતો. તેણે 21 બોલમાં 3 ફોરની મદદથી 28 રન કર્યા હતા. શિખર સારી શરૂઆતને મોટા સ્કોરમાં કન્વર્ટ કરવામાં નિષ્ફ્ળ રહ્યો.

મિસ્ડ ચાન્સ: કોહલી 9 રને રમી રહ્યો હતો ત્યારે મેક્સવેલની બોલિંગમાં સ્મિથે ડીપ મિડવિકેટ પર તેનો સરળ કેચ છોડ્યો હતો.

લોકેશ રાહુલ શૂન્ય રને મેક્સવેલની બોલિંગમાં ડીપ મિડવિકેટ પર સ્ટીવ સ્મિથના હાથે કેચ આઉટ થયો હતો.

ઓસ્ટ્રેલિયાએ 187 રનનો ટાર્ગેટ આપ્યો

ઓસ્ટ્રેલિયાએ 20 ઓવરમાં 5 વિકેટે 186 રન કર્યા છે. કાંગારું માટે મેથ્યુ વેડે પોતાના કરિયરની ત્રીજી અને ગ્લેન મેક્સવેલે આઠમી ફિફટી ફટકારતા અનુક્રમે 80 અને 54 રન કર્યા. તે સિવાય સ્ટીવ સ્મિથે 24 રનનું યોગદાન આપ્યું. ભારત માટે વી. સુંદરે 2, જ્યારે શાર્દુલ ઠાકુર અને ટી. નટરાજને 1-1 વિકેટ લીધી.

મેથ્યુ વેડ 80 રને આઉટ થયો

મેથ્યુ વેડ શાર્દુલ ઠાકુરની બોલિંગમાં LBW આઉટ થયો હતો. તેણે રિવ્યૂ લીધો પરંતુ અમ્પાયરનો નિર્ણય ફેરવી શક્યો નહીં. આ તેની T-20માં ત્રીજી ફિફટી હતી. તેણે પોતાની ઇનિંગ્સ દરમિયાન 7 ફોર અને 2 સિક્સ મારી.

નો બોલ ભારે પડ્યો: મેક્સવેલ 18 રને બેટિંગ કરી રહ્યો હતો ત્યારે ચહલની બોલિંગમાં રાહુલે તેનો કેચ છોડ્યો હતો. જોકે, નો-બોલ નીકળતા ચહલને જીવનદાન મળ્યું હતું.

સુંદરે ફિન્ચ અને સ્મિથને આઉટ કર્યા

આરોન ફિન્ચ શૂન્ય રને વી. સુંદરની બોલિંગમાં મીડ-ઓફ પર હાર્દિક પંડ્યાના હાથે કેચ આઉટ થયો હતો. તે પછી સ્ટીવ સ્મિથ સુંદરની બોલિંગમાં બોલ્ડ થયો હતો. તેણે 23 બોલમાં 24 રન કર્યા હતા.

ભારતે ટોસ જીતીને બોલિંગ લીધી

ભારતના કેપ્ટન વિરાટ કોહલીએ ટોસ જીતીને બોલિંગ કરવાનો નિર્ણય લીધો છે. ટીમ ઇન્ડિયાએ પોતાની પ્લેઈંગ-11માં કોઈ ફેરફાર કર્યો નથી. જ્યારે ઓસ્ટ્રેલિયાની ટીમમાં કેપ્ટન આરોન ફિન્ચની વાપસી થઇ છે. તે ઓલરાઉન્ડર માર્કસ સ્ટોઈનિસની જગ્યાએ રમી રહ્યો છે.

સ્ટેડિયમમાં 100% ફેન્સને અનુમતિ

ઓસ્ટ્રેલિયાની ન્યૂ સાઉથ વેલ્સ સરકારે એક નવો પ્રોટોકોલ જારી કર્યો છે. તેના અનુસાર હવે લોકોને બધે ફરવાની છૂટ છે. તેમજ સરકારે સ્ટેડિયમમાં પણ 100% ફેન્સને એન્ટ્રીની અનુમતિ આપી દીધી છે. કોરોના પછી આ પ્રથમ ક્રિકેટ મેચ છે, જેમાં 100% ફેન્સ સ્ટેડિયમમાં પહોંચીને મેચ જોઈ રહ્યા છે. આ પહેલાં 50% ફેન્સને જ પરવાનગી હતી.

ઓસ્ટ્રેલિયાની પ્લેઈંગ 11: આરોન ફિન્ચ (કેપ્ટન), મેથ્યુ વેડ (વિકેટકીપર), સ્ટીવ સ્મિથ, મોઝેઝ હેનરિક્સ, ગ્લેન મેક્સવેલ, ડાર્સી શોર્ટ, ડેનિયલ સેમ્સ, સીન એબોટ, મિચ સ્વેપ્સન, એડમ ઝામ્પા અને એન્ડ્રુ ટાઈ

ભારતની પ્લેઈંગ 11: શિખર ધવન, લોકેશ રાહુલ (વિકેટકીપર), વિરાટ કોહલી (કેપ્ટન), શ્રેયસ ઐયર, સંજુ સેમસન, હાર્દિક પંડ્યા, યુઝવેન્દ્ર ચહલ, વોશિંગ્ટન સુંદર, દિપક ચહર, શાર્દુલ ઠાકુર અને ટી. નટરાજન

LEAVE A REPLY

Please enter your comment!
Please enter your name here