કેરળ : મુસ્લિમ લીગના ગઢમાં પહેલી ટ્રાન્સજેન્ડર ઉમેદવાર

0
3

કેરળ વિધાનસભા ચૂંટણીમાં નવો ઇતિહાસ સર્જી રહ્યું છે. પહેલીવાર કોઇ ટ્રાન્સજેન્ડર ચૂંટણી મેદાનમાં છે. અનન્યા કુમારી એલેક્સને ડેમોક્રેટિક સોશિયલ જસ્ટિસ પાર્ટીએ ટિકિટ આપી છે. અનન્યા કોઇ નબળી બેઠક પરથી નહીં પણ મુસ્લિમ લીગના ગઢ માલાપ્પુરમના વેંગરાથી ચૂંટણી મેદાનમાં છે. મુસ્લિમ લીગના કદાવર નેતા પી. કે. કુન્હાલી કુટ્ટી પણ અહીંના ઉમેદવાર છે.

બે વર્ષ અગાઉ અનન્યાએ અન્ય એક રેકોર્ડ સર્જ્યો હતો. ત્યારે તે રાજ્યની પહેલી રેડિયો જૉકી બની હતી. હવે તેણે રાજકારણમાં આવવાનું નક્કી કર્યું છે. તે માત્ર 28 વર્ષની છે. તે જણાવે છે કે તેણે ગ્રાઉન્ડ લેવલે ચૂંટણીપ્રચાર શરૂ કરી રાખ્યો છે. તે ટ્રાન્સજેન્ડર તરીકે લોકો પાસેથી વોટ નથી માગી રહી પણ તેમને કહે છે કે તમે મારા પર ભરોસો રાખો, હું સારું કામ કરી બતાવીશ. રાજકારણમાં આવવાનું ક્યારે વિચાર્યું? તેવા સવાલના જવાબમાં તે કહે છે કે, ‘થોડા દિવસો અગાઉ મેં આ અંગે વિચાર્યું. મારી પાસે લીડરશિપ માઇન્ડ પણ છે. હું જીતીશ તો મારી બહુ મોટી જવાબદારી હશે કે બધાને જાતિ, જ્ઞાતિ-ધર્મ કે વર્ણના આધારે નહીં પણ એકસરખા ગણું. હું બાળપણમાં ભેદભાવનો શિકાર બની. હું છોકરી જેવી દેખાતી હતી પણ માતા-પિતા કહેતા કે તું છોકરો છે તો છોકરીની જેમ કેમ રહે છે? મેં બધાને કહ્યું કે હું છોકરો નહીં પણ છોકરી છું. મેં ધોરણ-12 સુધીના અભ્યાસ બાદ ભણવાનું છોડી દીધું. હું ઘણું સહન કરીને અહીં સુધી પહોંચી છું. કેરળના લોકો ટ્રાન્સજેન્ડરની ક્ષમતાથી પરિચિત છે. તેઓ જાણે છે કે હું સામાન્ય માણસ કરી શકે તે દરેક કામ કરી શકું છું.’ આ બેઠક પરથી ચૂંટણી લડી રહેલા સાંસદ કુટ્ટી યુડીએફના ટ્રબલશૂટર છે. 2011 અને 2016માં ધારાસભ્ય રહી ચૂક્યા છે, બે વખત સાંસદ રહ્યા છે. વેંગરામાં 1.82 લાખ મતદારો છે, જેમાંથી અંદાજે 70% મુસ્લિમ છે.

સીએમ વિજયનના અમુક કામ સારાં તો અમુક ખોટાં પણ છે
અનન્યા જણાવે છે કે તે જીતી તો મહિલા સુરક્ષા, શિક્ષણ, લઘુમતીઓ ખાસ કરીને ટ્રાન્સજેન્ડર્સ માટે દરેક ક્ષેત્રમાં અનામત માટે, ટ્રાન્સજેન્ડર્સની સુરક્ષા માટે કામ કરશે. વિજયન સરકારની કામગીરી અંગે અનન્યા કહે છે કે કેટલાંક કામ સારાં છે તો કેટલાંક ખોટાં પણ છે. આ વખતે કોની સરકાર બનશે તે અંગે અનન્યા કહે છે કે મતદારો યોગ્ય વ્યક્તિને ચૂંટશે. કેરળમાં લવ જેહાદનો મુદ્દો છે, જે અંગે તેનું કહેવું છે કે આ અંગે બોલવા હું યોગ્ય વ્યક્તિ નથી.

LEAVE A REPLY

Please enter your comment!
Please enter your name here