Tuesday, September 21, 2021
Homeફરી લોકડાઉન : કોરોનાની સ્થિતિ વચ્ચે હવે રાજ્યમાં લોકડાઉનની માગ બળવત્તર બનવા...
Array

ફરી લોકડાઉન : કોરોનાની સ્થિતિ વચ્ચે હવે રાજ્યમાં લોકડાઉનની માગ બળવત્તર બનવા લાગી

રાજ્યમાં દિવસે ને દિવસે કોરોનાની સ્થિતિ કથળવા લાગી છે. એમાં પણ છેલ્લા એક મહિનાથી તો કોરોના વિસ્ફોટ થયો છે અને એક ઘર છોડીને એક ઘરે દસ્તક આપી દીધી છે તેમજ નિષ્ણાતો હજુ પણ કોરોના સંક્રમણ વકરવાનો ભય વ્યક્ત કરી રહ્યા છે. હાલ ગુજરાત સરકારના હાથમાંથી બાજી સરકી ગઈ છે અને દર્દીઓને બેડ કે ઓક્સિજન પૂરાં પાડવાની સ્થિતિમાં રહી નથી. જો હજુ પણ સંક્રમણ કાબૂમાં નહીં આવે તો આવતીકાલે શું થશે એ અંગે કહેવું અને કલ્પવું અશક્ય છે. આ સ્થિતિ વચ્ચે હવે રાજ્યમાં લોકડાઉનની માગ બળવત્તર બનવા લાગી છે.

મોટા ભાગનાં ડોક્ટર્સ, વેપારી મંડળો, હાઈકોર્ટ અને જનતા સહિત સૌકોઈ લોકડાઉન કરવા માટે કહે છે, પરંતુ ગુજરાત સરકાર લોકડાઉન કરવા તૈયાર નથી, જેને પગલે અમદાવાદ, સુરત, વડોદરા, રાજકોટ, ભાવનગર અને જામનગરના વેપારીઓ અને ડોક્ટર્સ સાથે લોકડાઉન કરવું જોઈએ કે નહીં એ મામલે વાતચીત કરી હતી. રાજ્યનાં 6 શહેરમાંથી 5 શહેરનાં મેડિકલ એસોસિયેશન અને વેપારીઓએ લોકડાઉન કરવું જરૂરી હોવાનો મત વ્યક્ત રજૂ કર્યો હતો.

3થી 4 દિવસના લોકડાઉનને બદલે 15 દિવસનું લોકડાઉન જરૂરી
લોકડાઉન અંગે અમદાવાદ મેડિકલ એસોસિયેશનના પ્રમુખ ડો. કિરીટ ગઢવી જણાવે છે કે કોરોનાના વાયરસમાં મ્યૂટેશન થતાં એની સંક્રમણશક્તિ વધી છે, જેને કારણે કોરોનાના કેસમાં વધારો થયો છે. જોકે ગત વર્ષ કરતાં આ વર્ષે વાયરસની મારણશક્તિ ઘટી છે. લોકો આજેય માસ્ક વગર ફરી રહ્યા છે. વાયરસની ચેન તોડવા 3થી 4 દિવસના લોકડાઉનને બદલે 15 દિવસનું લોકડાઉન જરૂરી છે.

AMAના પૂર્વ પ્રમુખ ડો. મોના દેસાઇ કહે છે, કોરોના સંક્રમણ વધવા પાછળ વાયરસમાં મ્યૂટેશન, હાલની સીઝન જવાબદાર છે. લોકો કોરોનાની ગાઇડલાઇન્સનું પાલન નહીં કરે તો વાયરસની ચેન તોડવા માટે સરકાર પાસે કર્ફ્યૂ કે લોકડાઉન સિવાય કોઇ વિકલ્પ બચશે નહીં.

જીવનજરૂરી સિવાયની ઈન્ડસ્ટ્રીઝ બંધ કરવામાં આવે
જ્યારે અમદાવાદ મેડિકલ એસોસિયેશને GCCIને પત્ર લખી મહામારીને નાથવા માટે સાથે મળી કામ કરવાની સાથે કેટલાંક સૂચનો પણ કર્યાં છે. GCCIને લખેલા પત્રમાં જણાવ્યું છે કે ફક્ત ખૂબ જરૂરી હોય તેવી જ ઈન્ડસ્ટ્રીઝમાં કામ ચાલુ રાખવામાં આવે (શક્ય હોય તો અડધી ક્ષમતા સાથે), બાકીની ઓછામાં ઓછાં બે અઠવાડિયાં માટે બંધ કરવામાં આવે, જેથી કોવિડના ચેપની સાંકળને તોડી શકાય. તેમજ કારીગરોને સુપર સ્પ્રેડર બનતાં અટકાવવા માટે તમામ કારીગરો માટે રસીકરણ ફરજિયાત બનાવવામાં આવે.

લોકડાઉન નહીં કરવામાં આવે તો સ્થિતિ વધુ કથળી શકે
સુરતમાં ઈન્ડિયન મેડિકલ એસોસિયેશન દ્વારા સાત દિવસના સંપૂર્ણ લોકડાઉનની માગ સાથે રાજ્ય સરકારને પત્ર લખવામાં આવ્યો છે. જો લોકડાઉન નહીં લગાવવામાં આવે તો આગામી દિવસોમાં સ્થિતિ વધુ કથળે એવાં એંધાણ વર્તાઇ રહ્યાં છે. હેલ્થ સ્ટાફની જેટલી ક્ષમતા છે ત્યાં સુધી સેવા આપી રહ્યા છે, પરંતુ જો આ સ્ટાફની ધીરજ ખૂટી જશે અને હેલ્થ સ્ટાફના લોકો કોરોના સંક્રમિત થશે તો સ્થિતિ વધુ ગંભીર બનવાની શક્યતા છે.

જ્યારે સુરત ફોસ્ટા (FOSTA) દ્વારા શહેરમાં એક સપ્તાહ લોકડાઉનની માગ કરાઈ છે. આ અંગે મુખ્યમંત્રીને પત્ર લખી રજૂઆત કરાઈ છે. એ મુજબ માત્ર શનિ-રવિ બંધ રાખવાથી કોરોના ચેન તૂટશે નહીં, આખું સુરત એક સપ્તાહ માટે લોકડાઉન કરવા માગ કરાઈ છે.

કોરોના ચેન તોડવી પ્રથમ આવશ્યક
રાજકોટ મેડિકલ એસોસિયેશન દ્વારા કોરોનાની ચેન તોડવા માટે 21 દિવસનું લોકડાઉન કરવાની જરૂર હોવાની રજૂઆત કરી છે. IMAના પૂર્વ પ્રમુખ ડો.અતુલ પંડ્યાએ જણાવ્યું હતું કે હાલ રાજકોટની સ્થિતિ ખૂબ જ ભયાનક છે. હાલની પરિસ્થિતિ જોતાં કોરોના ચેન તોડવી પ્રથમ આવશ્યકતા છે અને એ માટે લોકડાઉન એ જ વિકલ્પ માનવામાં આવી રહ્યો છે.

આંશિક લોકડાઉન જરૂરી છેઃ વડોદરા મેડિકલ એસો.ના પ્રમુખ
ઇન્ડિયન મેડિકલ એસોસિયેશન, વડોદરાના પ્રમુખ પરેશ મજમુદારે જણાવ્યું હતું કે હું IMA, વડોદરાના પ્રમુખ તરીકે નથી કહેતો પણ મારો પર્સનલ અભિપ્રાય છે કે કોરોનાની ચેન તોડવા માટે આંશિક લોકડાઉન જરૂરી છે, પરંતુ લોકડાઉન માટે આર્થિક, વેપાર રોજગાર સહિતનાં અનેક પાસાંનું ધ્યાન રાખવું પડતું હોય છે. જો લોકો જ સમજે અને ઘરની બહાર ન નીકળે તો લોકડાઉનની જરૂર નથી.

લોકડાઉન, સોશિયલ ડિસ્ટન્સ, માસ્કનો વિરોધી છું: ડો.કુહાડિયા
ભાવનગરના ડો.એન.પી.કુહાડિયાએ જણાવ્યું હતું કે હું 37 વર્ષથી આરોગ્યસેવા સાથે સંકળાયેલો છું. જે લોકો લોકડાઉનની હિમાયત કરતા હોય તે ઘરમાં રહે અને ઘરની બહાર નીકળવા માટે કોઈ દબાણ લાવવામાં આવતું નથી. એટલે જેટલા લોકો લોકડાઉન ઇચ્છતા હોય તે પોતે સ્વૈચ્છિક કામ-ધંધા છોડી પોતાના કુટુંબને ઘરમાં રાખે, બીજાને વિપરીત અસર થતી હોય એ ધ્યાનમાં લેવી જોઈએ. લોકડાઉનની સ્પષ્ટ ના પાડું છું. લોકડાઉનથી ચેન તૂટે એ વાત ક્યાંય સાબિત થઈ નથી.

વાયરસ એક એવી વસ્તુ છે કે પહેલા બધા કહેતા હતા કે નિર્જીવ વસ્તુઓ પર 12 કલાક જીવિત રહે છે, પરંતુ હવે એ બધા જ ના પાડી રહ્યા છે. ભૂતકાળમાં જેમ વાયરસ ફેલાતા હતા તેમ જ ફેલાય છે. આ વાયરસ હવાથી ફેલાય છે એટલે એની કોઈ મર્યાદા હોતી નથી. કોઈની પાસે કોઈ ચોક્કસ માહિતી જ નથી.

હું તો પહેલા જ દિવસથી લોકડાઉન, સોશિયલ ડિસ્ટન્સ, માસ્કનો વિરોધી છું, લોકડાઉનની એવા જ લોકો હિમાયત કરી રહ્યા છે જે એક વર્ષ સુધી ઘરે બેઠા ખાય શકે. ખરેખર તો ગરીબોનું પણ વિચારવું જોઈએ.

લોકડાઉન વિના કોઈ જ રસ્તો જ નથી: ડો. કાનાણી
ઓલ ઇન્ડિયા ડોક્ટર એસોસિયેશનના પૂર્વ ઉપપ્રમુખ ડો.કાનાણીએ જણાવ્યું હતું કે લોકડાઉનની પૂરેપૂરી જરૂર છે. માર્ચ 2020માં જ્યારે 100 કેસ ન હતા ત્યારે લોકડાઉન કર્યું હતું. અત્યારે 20 હજાર ઉપર કેસો આવી રહ્યા છે તો લોકડાઉન કરતા નથી. કોરોનાની ચેન તોડવા સંપૂર્ણ લોકડાઉન થાય તો જ શક્ય છે, બાકી સ્વયંભૂમાં કંઈ થાય નહીં, હાલની પરિસ્થિતિ ખૂબ જ ગંભીર છે. ગુજરાતના તમામ ડોક્ટર વતી હું કહું છું કે લોકડાઉન કરવું જોઈએ, એના વગર કંઈ શક્ય નથી. સરકાર પાસે નથી મેડિકલ, નથી સ્ટાફ, નથી ઇન્જેક્શન, નથી એમ્બ્યુલન્સ, નથી સ્મશાન;, તમામ રામ ભરોસે ચાલે છે.

લોકડાઉનની જરૂર છે પણ એ ઇચ્છતા નથી: ડો.ચિન્મય શાહ
જ્યારે ડો.ચિન્મય શાહએ જણાવ્યું હતું કે જો લોકો ન સમજે તો લોકડાઉન કરવું પડે, અત્યારની પરિસ્થિતિ પ્રમાણે લોકોએ સંભાળીને રહેવું જોઈએ. દરેક વ્યક્તિએ સોશિયલ ડિસ્ટન્સનું પાલન કરવું જોઈએ, માસ્ક પહેરવું જોઈએ, રસી લીધી હોય કે ન લીધી હોય, પાલન કરવું જોઈએ. સરકાર કે બીજાને દોષ આપવાને બદલે પોતે ધ્યાન રાખવું જોઈએ. લોકડાઉનની જરૂરિયાત છે, પણ આપણે લોકડાઉન ઇચ્છતા નથી, કારણ કે ધંધા-રોજગાર પર એની અસર પડે છે. જો આપણે ઘર બહાર જઈએ તો કોરોનાને ઘરમાં પ્રવેશવા આમંત્રિત કરીએ છીએ, પણ ઘરમાં જ રહીએ તો કોરોનાથી હંમેશાં દૂર રહીશું

પરિસ્થિતિ ખરાબ છે; લોકડાઉન થવું જોઈએ: JMA
જામનગર મેડિકલ એસોસિયેશનના પ્રમુખ પ્રશાંત તન્નાએ જણાવ્યું હતું કે પરિસ્થિતિ ખરાબ છે, વધારે સારું કહી શકાય નહીં. ગયા વખતે જે તકલીફો બીજા વીકમાં થતી એ આ વખતે પહેલા વીકમાં થાય છે અને બહુ ઝડપથી થાય છે.

લોકડાઉન કરશો તો લોકોને ઘણીબધી મુશ્કેલી પડવાની છે, જે એડમિટેડ છે તેને સારવાર માટે જરૂર પડી તો એ પણ મુશ્કેલીમાં પડશે. ત્યાર પછી બે દિવસ પછી કોઈને તાવ આવ્યો તો દવાખાને જવું પડશે તો ઇસ્યુ તો એનો એ જ રહેવાનો છે. દવાખાનાં તો બંધ નહીં કરી શકાય.

છેલ્લા ઉપાય તરીકે બંધ કરવા સિવાય કોઈ ઉપાય રહેશે નહીં
લોકો સમજશે નહીં તો છેલ્લા ઉપાય તરીકે બંધ કરવા સિવાય કોઈ ઉપાય રહેશે નહીં. દિલ્હી કે અન્ય રાજ્યોમાં પણ જોયું છે કે લોકડાઉન કર્યા બાદ લોકો ઊમટી પડ્યા અને ભીડ વધી ગઈ. આ વાયરસ ઝડપથી જ ગંભીર સ્વરૂપ લઇ લે છે, કંઈપણ એવું લાગે તો તરત જ ડોક્ટરને બતાવીને દવા લઈ લો. બંધ કરશો તો પાસ લેવાની લાઈન લાગશે. સિસ્ટમ કેવી રીતે ચાલશે?

જામનગર મેડિકલ એસોસિયેશનના ઉપ-પ્રમુખ ડો.અલ્પેશ ચાવડાએ જણાવ્યું હતું કે હાલ પરિસ્થિતિ ઘણી ખરાબ છે. પબ્લિક અને વેપારી પણ પોતાની રીતે બંધ કરે છે. લોકડાઉન થયા બાદ લોકો શેરીઓમાં ભજિયાં પાર્ટી કરે. ભેગા થઈએ તોપણ બધું જ થાય. શહેરની પરિસ્થિતિ પણ ખરાબ છે. કોરોનાની ચેન તોડવા માટે લોકોએ પૂરેપૂરી સાવચેતી રાખવી પડે છે.

RELATED ARTICLES

LEAVE A REPLY

Please enter your comment!
Please enter your name here

Most Popular

Recent Comments