ક્રિકેટમાં ફિક્સિંગ : ICCએ કહ્યું- 50 કેસમાંથી મોટાભાગના ભારતથી જોડાયેલા, BCCI અધિકારીએ કહ્યું- દર વર્ષે સટ્ટાબાજીથી 40 હજાર કરોડની ગેરકાયદેસર આવક થાય છે

0
3

ઇન્ટરનેશનલ ક્રિકેટ કાઉન્સિલ (ICC)નું માનવું છે કે ભારતીય ક્રિકેટમાં ફિક્સિંગ અને ભ્રષ્ટાચારના મૂળ બહુ ઊંડા છે. ICC ફિક્સિંગને લગતા 50 જેટલા કેસોની તપાસ કરાવી રહ્યું છે, તેમાંથી મોટાભાગના કેસ ભારત સાથે જોડાયેલા છે.

તે જ સમયે, બોર્ડ ઓફ ક્રિકેટ ફોર કંટ્રોલ ઇન ઇન્ડિયા (BCCI)ના એન્ટી કરપ્શન યુનિટના હેડ, અજિત સિંહનું કહેવું છે કે દર વર્ષે સટ્ટાબાજીથી 40 હજાર કરોડની ગેરકાયદેસર આવક થાય છે. ICCના એન્ટી કરપ્શન યુનિટ સાથે સંકળાયેલા એક અધિકારીએ આ ખુલાસો સ્પોર્ટ્સ લો અને પોલિસી સંબંધિત વેબિનારમાં કર્યો હતો.

ભારતીય ક્રિકેટમાં ભ્રષ્ટાચાર ઓછો નથી થયો: ICC
ICCના એન્ટી કરપ્શન યુનિટના અધિકારી સ્ટીવ રિચાર્ડસનના જણાવ્યા અનુસાર, 2013ની IPLમાં સ્પોટ ફિક્સિંગના ઘટસ્ફોટ બાદ, એવું લાગ્યું હતું કે ભારતીય ક્રિકેટમાં ભ્રષ્ટાચાર ઓછો થશે. પરંતુ તાજેતરના અહેવાલમાં તેનાથી વિરુદ્ધ વાતો સામે આવી છે.

સટોડિયાઓ ખેલાડીઓનો સંપર્ક કરવાનો પ્રયાસ કરી રહ્યા છે
રિચાર્ડસન કહ્યું, “ખેલાડીઓ ચેનનો અંતિમ ભાગ છે. મુશ્કેલી એ છે કે જે લોકો આ આખો ધંધો ચલાવે છે તે મેદાનની બહાર બેસે છે. હું BCCI અને ભારતીય તપાસ એજન્સીઓને આવા 8 નામ આપી શકું છું, જે ખેલાડીઓને પૈસા આપીને ફસાવવા પ્રયાસ કરી રહ્યા છે. ” તેમણે વધુમાં કહ્યું કે, તપાસમાં હજી સુધી એક હાઈપ્રોફાઈલ ભારતીય ક્રિકેટરનું નામ બહાર આવ્યું નથી.

કર્ણાટક પ્રીમિયર લીગની પણ તપાસ ચાલી રહી છે
ગયા વર્ષે કર્ણાટક પ્રીમિયર લીગ (KPL)માં, ઘણા લોકો પર ફિક્સિંગનો આરોપ મૂકાયો હતો, જેમાં ખેલાડીઓ તેમજ ટીમના માલિકોનો સમાવેશ હતો. અજિત સિંહે કહ્યું કે પોલીસે આ લોકો સામે ચાર્જશીટ દાખલ કરી છે.

30થી 40 હજાર કરોડની ગેરકાયદેસર આવક થાય છે
તેમણે કહ્યું કે આ આખો ધંધો સટ્ટાબાજીથી થતી ગેરકાયદેસર કમાણી પર આધારિત છે. ફિક્સર્સ ઝડપથી પૈસા કમાવવા માટે ખેલાડીઓ, સપોર્ટ સ્ટાફ, અધિકારીઓ અને ફ્રેન્ચાઇઝ માલિકોનો સંપર્ક કરે છે. દર વર્ષે સટ્ટાબાજીથી 30થી 40 હજાર કરોડની આવક થાય છે. રાજ્યની અનેક ક્રિકેટ લીગની તપાસ દરમિયાન જાણવા મળ્યું કે કેટલીક મેચોમાં આ રકમ 19 કરોડ સુધીની હતી.

કડક કાયદા દ્વારા ક્રિકેટમાં ભ્રષ્ટાચાર અટકશે
ICCનું માનવું છે કે કાયદા મુજબ ફિક્સિંગ ગુનો જાહેર થાય ત્યારે જ ભારતમાં ક્રિકેટમાં ભ્રષ્ટાચારને રોકી શકાશે. રિચાર્ડસનને કહ્યું કે, “શ્રીલંકા મેચ ફિક્સિંગ સામે કાયદો લાવનાર પ્રથમ દેશ હતો, તેથી ક્રિકેટ ત્યાં સલામત છે.” તે જ સમયે, ઓસ્ટ્રેલિયામાં વસ્તુઓ વધુ સારી છે. જોકે, ભારતમાં આવો કોઈ કાયદો નથી, જેના કારણે BCCI ભારતમાં ખુલ્લેઆમ સંચાલન કરી શકતું નથી. ”

ભારતમાં કાયદામાં પરિવર્તન ગેમ ચેન્જર સાબિત થશે
ઓસ્ટ્રેલિયન કાયદા મુજબ ફિક્સિંગમાં સામેલ થવાની શંકાના આધારે મોટી ટૂર્નામેન્ટ પહેલા તે કોઈને પણ તેના દેશમાં આવતા રોકી શકે છે. 2021માં ભારતમાં T-20 વર્લ્ડ કપ અને 2023 વનડે વર્લ્ડ કપ પણ થવાનો છે, આવામાં કાયદામાં ફેરફાર ગેમચેન્જર સાબિત થઈ શકે છે.

સિંહે કહ્યું, જો પ્રિવેન્શન ઓફ સ્પોર્ટ્સ ફ્રોડ બિલ કાયદો બન્યો તો તેનાથી ભ્રષ્ટાચાર અને ફિક્સિંગને રોકવામાં ઘણી હદ સુધી મદદ મળશે.