નડિયાદ : કાઝીએ પર્વ નિમિત્તે ઘરે રહીને નમાઝ અદા કરવા મુસ્લિમ બીરાદરોને કરી અપીલ

નડિયાદમાં દર વર્ષે બકરી ઈદની ઉજવણી કરવામાં આવે છે. પરંતુ છેલ્લા બે વર્ષથી કોરોનાનું ગ્રહણ લાદ્યુ છે. ચાલુ વર્ષે ભલે કેસ ઓછા હોય પરંતુ આ વર્ષે પણ નડિયાદની શાહી ઈદગાહમાં ઈદના દિવસની નમાઝ પઢવામાં આવશે નહી તેવો નિર્ણય લેવાયો છે.

આગામી 21 જુલાઈના રોજ બકરી ઈદ હોવાથી આ વર્ષે પણ નડિયાદમાં અમદાવાદી દરવાજા બહાર આવેલી શાહી ઈદગાહમાં આ પર્વ નિમિત્તે નમાઝ પઢવામાં આવશે નહી તેમ સમસ્ત મુસ્લિમ સમાજના શહેરકાઝી અબ્દુલહૈઈ કાદરીએ જણાવ્યું છે.

મુસ્લિમ બીરાદરોને ઘરે રહીને નમાઝ અદા કરવા અપીલ કરવામાં આવી છે. આ સાથે શહેરકાઝીએ જણાવ્યું છે કે, સરકાર તરફથી ચાલતાં મુફ્ત રસીકરણ અભિયાનમાં સમાજના ભાઈઓ, બહેનો, યુવાન, યુવતીઓ સહિત વૃદ્ધ વડિલ લોકો રસી મુકાવવા અપીલ કરી છે.