નવી દિલ્હી. કેન્દ્ર સરકાર કોરોના સામેની લડાઈ માટે ખર્ચવામાં આવતા રાહત પેકેજ પર કેપિંગ લગાવી શકે છે. બે વરિષ્ઠ અધિકારીઓએ કહ્યું હતું કે સરકાર કોરોના સંબંધિત રાહત પેકેજને રૂ. 4.5 લાખ કરોડ પર મર્યાદિત કરી શકે છે. રેટિંગ્સ ન બગડે તે માટે સરકાર આ પગલું ભરી શકે છે. રોયટર્સ સાથે વાત કરતા એક અધિકારીએ કહ્યું કે અમે ખૂબ સાવધ છીએ. ઘણા દેશોની રેટિંગ્સમાં ઘટાડો થવાનું શરૂ થયું છે અને રેટિંગ એજન્સીઓ વિકસિત અને ઉભરતા દેશો સાથે અલગ વર્તન કરી રહી છે. ગુરુવારે ફિચે ચેતવણી આપી હતી કે જો નાણાકીય દૃષ્ટિકોણ નબળો પડે તો ભારતના સોવરેન રેટિંગ પર દબાણ વધી શકે છે.
બીજું પ્રોત્સાહન પેકેજ જીડીપીના 1.5 થી 2 ટકા હોઈ શકે છે
પ્રોત્સાહન પેકેજની તૈયારી કરી રહેલા અધિકારીએ જણાવ્યું હતું કે, અમે જીડીપીના 0.8% જેટલા પ્રોત્સાહક પેકેજની જાહેરાત કરી દીધી છે. હવે અમારી પાસે જીડીપીના 1.5%થી 2%ના પ્રોત્સાહક પેકેજ બાકી છે. સરકારે કોરોનાના આર્થિક પ્રભાવને પહોંચી વળવા માર્ચમાં રૂ. 1.7 લાખ કરોડના પ્રોત્સાહક પેકેજની જાહેરાત કરી હતી. આ પેકેજમાં, ગરીબોમાં રોકડ ટ્રાન્સફર અને અનાજ વિતરણની જોગવાઈ કરવામાં આવી હતી.
બીજા પેકેજની રૂપરેખા
બંને અધિકારીઓએ કહ્યું કે બીજા પેકેજ માટેની રૂપરેખા તૈયાર કરવામાં આવી છે. આ પેકેજમાં જે લોકો નોકરી ગુમાવે છે તેમને અને નાની-મોટી કંપનીઓને રાહત મળી શકે છે. કંપનીઓ માટે કર મુક્તિ જેવા પગલાની જાહેરાત કરી શકાય છે. જોકે નાણાં મંત્રાલયના પ્રવક્તાએ આ અંગે કોઈ ટિપ્પણી કરી નથી.
ફિચ અને S&Pએ ભારતના રોકાણ ગ્રેડ રેટિંગ આપ્યું છે
રેટિંગ એજન્સી ફિચ અને સ્ટાન્ડર્ડ એન્ડ પુઅર્સ (S&P) બંનેએ તાજેતરમાં જ ભારતને જંક રેટિંગથી થોડું જ ઉપર ઇન્વેસ્ટમેન્ટ ગ્રેડ રેટિંગ આપ્યું છે. મૂડીઝ ઇન્વેસ્ટર્સ સર્વિસ એકમાત્ર રેટિંગ એજન્સી છે કે જેણે તેના ઇન્વેસ્ટમેન્ટ ગ્રેડ રેટિંગને જંક રેટીંગથી બે સ્થાન ઉપર સ્થાન આપ્યું છે. કોરોના ચેપના ફેલાવાને રોકવા માટે અમલમાં મૂકાયેલા 40 દિવસના રાષ્ટ્રવ્યાપી લોકડાઉનથી ભારતની અર્થવ્યવસ્થા અસ્થિર થઈ છે. ઘણા નિષ્ણાતોએ આ વર્ષે અર્થવ્યવસ્થાને વધુ સંકોચાવાની આગાહી કરી છે.
વેરા વસૂલાતની સ્થિતિ ઘણી કફોડી છે
અન્ય એક અધિકારીએ કહ્યું કે સરકારની આવકની સ્થિતિ ખૂબ મુશ્કેલ પરિસ્થિતિમાં છે. ટેક્સ કલેક્શન એકદમ ખરાબ છે. અધિકારીના જણાવ્યા મુજબ ચાલુ નાણાકીય વર્ષમાં રૂ. 2.1 લાખ કરોડ એકત્રિત કરવા માટે શરૂ કરાયેલ ખાનગીકરણનો કાર્યક્રમ શરૂ થવાની અપેક્ષા નથી. નાણાકીય ખોટને પહોંચી વળવા સરકારે રાષ્ટ્રપતિ, વડા પ્રધાન સહિતના તમામ સાંસદોના પગારમાં ઘટાડો કર્યો છે. આ ઉપરાંત સરકારી કર્મચારીઓ અને પેન્શનરોના ભથ્થામાં થયેલા વધારાને રોકી દેવાયો છે.
