અમેરિકામાં એક જ અઠવાડિયામાં 16 લાખ નવા કેસ નોંધાયા, બાઇડને કહ્યું- હવે આવનારો સમય મુશ્કેલભર્યો રહેશે

0
37

વિશ્વમાં કોરોના દર્દીઓની સંખ્યા 7.83 કરોડથી વધુ થઈ છે. 5 કરોડ 50 લાખથી વધુ લોકો સાજા થયા છે. અત્યારસુધીમાં 17 લાખ 22 હજારથી વધુ લોકોએ જીવ ગુમાવ્યો છે. આ આંકડા www.worldometers.info/coronavirus અનુસાર છે. અમેરિકામાં કોરોનાના નવા કેસો ઘટવાના બદલે વધી રહ્યા છે. 20 જાન્યુઆરીના રોજ રાષ્ટ્રપતિપદના શપથ લેવા જઈ રહેલા જો બાઈડન પણ આ અંગે સતર્ક છે. તેમણે મંગળવારે સ્પષ્ટ કહ્યું – આગામી સમય ખૂબ જ મુશ્કેલ અને અંધકારમય બની શકે છે.

એક અઠવાડિયામાં 14% કેસ વધ્યા

‘ધ ગાર્ડિયન’ના એક અહેવાલ મુજબ, અમેરિકામાં 20 ડિસેમ્બરના રોજ પૂરા થયેલા સપ્તાહમાં 16 લાખ નવા કેસ નોંધાયા છે. આંકડા અનુસાર, એ ગયા અઠવાડિયા કરતાં 14% વધારે છે. WHO અનુસાર, કોઈપણ દેશમાં કોરોના કેસોમાં આટલો વધારો જોવા મળ્યો નથી. કેલિફોર્નિયાની સૌથી વધુ મુશ્કેલીઓ છે. અહીંની હોસ્પિટલોમાં બેડ ઓછાં પડી રહ્યાં છે. એક અઠવાડિયામાં લગભગ પાંચ લાખ નવા કેસ નોંધાયા હતા.

બાઈડનને પણ અહેસાસ

રાષ્ટ્રપતિ ઇલેકટ જો બાઈડનને પણ અહેસાસ છે કે કોરોનાને કારણે પરિસ્થિતિ કેવી વિકટ થઈ રહી છે. મંગળવારે તેમણે કોરોના ટાસ્કફોર્સના સલાહકાર ડોક્ટર એન્થોની ફૌસી અને મીડિયા સાથે વાતચીત કરી હતી. મીડિયાને કહેવામાં આવ્યું હતું કે રાહત પેકેજ બહાર પાડવામાં આવ્યું છે અને નવી સરકાર સૌથી પહેલા સંક્રમણને નિયંત્રણમાં લેવાના ઉપાય બાબતે વિચારણા કરશે બાઈડને કહ્યું- આગામી સમય ખૂબ જ મુશ્કેલભર્યો રહેશે. આપણે કોરોના સામેની લડાઈ લડવાની છે. ડોક્ટર ફૌસીએ પણ મંગળવારે વેક્સિનેશન કરાવ્યું હતું. ત્યાર બાદ કહ્યું- હું ઇચ્છું છું કે લાખો અમેરિકનો જલદી આ વેક્સિન લગાવે, એ એકદમ સુરક્ષિત છે.

ફ્રાન્સે બ્રિટન માટે સરહદો ખોલી

કોરોનાના નવા સ્ટ્રેનને લઈને ઘણા દેશોએ બ્રિટન પ્રવાસ પર પ્રતિબંધ લગાવી દીધો છે. બીજી તરફ, બ્રિટનને ફ્રાન્સથી થોડી રાહત મળી છે. ફ્રાન્સે કેટલીક શરતો સાથે બ્રિટનની સરહદો ખોલી છે. જો આ ન થયું હોત તો બ્રિટનમાં કેટલાક આવશ્યક માલની અછત શરૂ થઈ શકે છે. સેંકડો ટ્રકો બ્રિટન અને ફ્રાન્સની સરહદે ઊભી છે. તેમાં ઘણા યુરોપિયન દેશોમાંથી આવતો માલ-સમાન ભરેલો છે. નાતાલને કારણે માત્ર બ્રિટનમાં જ નહીં, પણ યુરોપમાં પણ લોકો ખરીદી કરી રહ્યા છે. મંગળવારે યુકે-ફ્રાન્સ બોર્ડર પર પાર્ક ટ્રકો. ફ્રાન્સે બ્રિટન જતી ટ્રકોને મંજૂરી આપી છે.

ચીનમાં ફરી 15 કેસ

ચીનમાં 22 ડિસેમ્બરે કોરોનાના નવા 15 કેસ સામે આવ્યા છે. આ પહેલાં એટલે કે સોમવારે 21 ડિસેમ્બરે પણ એટલા જ કેસ સામે આવ્યા હતા. હવે ચીનના આરોગ્ય વિભાગે કહ્યું હતું કે તેઓ તે જાણવાનો પ્રયાસ કરી રહ્યા છે કે કોઈ નવો ક્લસ્ટર તો નથી બની રહ્યો. મોટા ભાગના કેસ એક જ જગ્યાએ સામે આવી રહ્યા છે અને હંમેશાંની જેમ ચીને નથી જણાવ્યું કે આ કેસ કયા રાજ્યના કે વિસ્તારના છે.

કોરોનાથી અસરગ્રસ્ત ટોપ-10 દેશની પરિસ્થિતિ

દેશ કેસ મૃત્યુ સાજા થયા
અમેરિકા 18,684,628 330,824 10,945,097
ભારત 10,099,308 146,476 9,662,697
બ્રાઝિલ 7,320,020 188,285 6,354,972
રશિયા 2,906,503 51,912 2,319,520
ફ્રાન્સ 2,490,946 61,702 186,058
બ્રિટન 2,110,314 68,307 ઉપલબ્ધ નહીં
તુર્કી 2,043,704 18,351 1,834,705
ઈટાલી 1,977,370 69,842 1,301,573
સ્પેન 1,830,110 49,260 ઉપલબ્ધ નહીં
આર્જેંન્ટીના 1,547,138 41,997 1,374,401

LEAVE A REPLY

Please enter your comment!
Please enter your name here