આમોદ શહેરમાં રખડતા ઢોરનો ત્રાસ અટકાવવામાં નગરપાલિકાની નિષ્ક્રિયતા ફરી એકવાર સામે આવી છે. નગરપાલિકાના સત્તાધીશો અને મુખ્ય અધિકારીઓની બેદરકારીને કારણે નાગરિકોના જીવ જોખમમાં મુકાયા છે. તાજેતરમાં, બગાસિયા ચોળા વિસ્તારમાં રહેતા પેરાલિસિસથી પીડિત મુકેશભાઈ દરજીને એક રખડતી ગાયે ગંભીર રીતે અડફેટે લીધા હતા, જેમાં તેમને માથા અને પગના ભાગે ગંભીર ઈજાઓ થઈ છે. જો સ્થાનિક લોકો સમયસર મદદ માટે ન દોડ્યા હોત, તો મોટી દુર્ઘટના બની શકતી હતી.
આ ઘટના નગરપાલિકાના ‘સ્વચ્છતા’ અને ‘સુરક્ષા’ના દાવાઓનો પર્દાફાશ કરે છે. સ્થાનિકોના જણાવ્યા મુજબ, અગાઉ અનેક રજૂઆતો અને મીડિયાના અહેવાલો છતાં, તંત્ર દ્વારા કોઈ નક્કર પગલાં લેવાયા નથી. આ પરિસ્થિતિ સ્પષ્ટપણે દર્શાવે છે કે નગરપાલિકા માત્ર કાગળ પર કામગીરી કરે છે, જ્યારે વાસ્તવિકતામાં લોકો ભયના ઓથાર હેઠળ જીવી રહ્યા છે.
આમોદ નગરપાલિકા દ્વારા તાજેતરમાં જ ઢોર ડબ્બાના સમારકામ માટે 4 લાખ રૂપિયાનો ખર્ચ કરવામાં આવ્યો હોવા છતાં, એક પણ ઢોર પકડવામાં આવ્યું નથી. આ મોટો ખર્ચ થયા બાદ પણ પરિણામ શૂન્ય રહેતા લોકોમાં ભ્રષ્ટાચારની આશંકાઓ સેવાઈ રહી છે. પ્રજાના પૈસાનો આ રીતે થતો દુરુપયોગ જવાબદાર સત્તાધીશોની ઉદાસીનતા સાબિત કરે છે.
શહેરના નાગરિકોમાં આ ઘટનાને લઈને ભારે રોષ જોવા મળી રહ્યો છે. તેઓ હવે તંત્ર સામે કડક કાર્યવાહીની માંગ કરી રહ્યા છે અને જો કોઈ મોટી દુર્ઘટના થશે તો તેની સીધી જવાબદારી મુખ્ય અધિકારીની રહેશે તેવી ચીમકી પણ ઉચ્ચારવામાં આવી છે. લોકોએ માગણી કરી છે કે નગરપાલિકાએ તાત્કાલિક ધોરણે એક ખાસ ટાસ્ક ફોર્સની રચના કરવી જોઈએ જેમાં પશુ પકડનારાઓ, પોલીસ અને સ્વયંસેવકોનો સમાવેશ થાય. સાથે જ પશુ માલિકો સામે કડક કાયદાકીય કાર્યવાહી અને દંડ વસૂલવામાં આવે તો જ આ સમસ્યાનું કાયમી નિરાકરણ આવી શકે છે.
નગરપાલિકા આ મામલે ક્યારે જાગશે? શું તંત્ર કોઈનો જીવ ગયા બાદ જ કુંભકર્ણની નિંદ્રામાંથી જાગશે કે પછી નાગરિકોના જીવની સુરક્ષાને પોતાની પ્રાથમિકતા બનાવીને તાત્કાલિક પગલાં ભરશે?