દેશભરમાં ખગોળપ્રેમીઓ માટે એક અદ્ભુત અવકાશી ઘટનાનો અવસર આવી રહ્યો છે. આગામી રવિવારે, 7મી સપ્ટેમ્બર, 2025ના રોજ, સમગ્ર ભારતમાં ખગ્રાસ ચંદ્રગ્રહણનો નજારો જોવા મળશે. આ સમયે ચંદ્ર લાલ રંગનો એટલે કે ‘બ્લડ મૂન’ તરીકે જોવા મળશે, જે એક અનોખો અનુભવ હશે. ભારત જન વિજ્ઞાન જાથાએ આ ઘટનાને નરી આંખે નિહાળવા માટે લોકોને પ્રોત્સાહિત કરી રહ્યું છે અને મુંબઈ ખાતે ખાસ પ્રદર્શનનું આયોજન પણ કરવામાં આવ્યું છે.
ભારતીય સમય મુજબ, આ ગ્રહણ કુલ 5 કલાક અને 27 મિનિટ સુધી ચાલશે. ગ્રહણની શરૂઆત રાત્રે 8 વાગ્યે 58 મિનિટ અને 21 સેકન્ડે થશે અને તે રાત્રે 12 વાગ્યે 41 મિનિટે તેના મધ્ય તબક્કામાં પહોંચશે. ગ્રહણનો અંત રાત્રે 2 વાગ્યે 25 મિનિટે થશે. આ સમયગાળા દરમિયાન, ચંદ્ર તેની કક્ષામાં પૃથ્વીના પડછાયામાં ઢંકાશે, જેના કારણે તે લાલ રંગનો દેખાશે. આ ઘટનાને એશિયા, ઓસ્ટ્રેલિયા, આફ્રિકા અને યુરોપ જેવા પ્રદેશોમાં પણ જોઈ શકાશે.
ભારત જન વિજ્ઞાન જાથાના ચેરમેન અને એડવોકેટ જયંત પંડ્યાએ જણાવ્યું કે, ગ્રહણ એ માત્ર એક ખગોળીય ઘટના છે અને તેનો માનવ જીવન પર કોઈ પ્રભાવ પડતો નથી. આ ઘટનાને લઈને પ્રવર્તતી જૂની માન્યતાઓ અને અંધશ્રદ્ધાઓથી દૂર રહેવા તેમણે લોકોને અનુરોધ કર્યો છે. તેમણે કહ્યું કે, લોકોએ તેમના ઘરની અગાશી અથવા ખુલ્લા મેદાનમાંથી આ અદ્ભુત નજારાનો આનંદ લેવો જોઈએ. જાથા દ્વારા મુંબઈમાં ગ્રહણ નિદર્શન કાર્યક્રમનું આયોજન કરવામાં આવ્યું છે જેથી લોકો વૈજ્ઞાનિક દૃષ્ટિકોણથી આ ઘટનાને સમજી શકે.
આ ગ્રહણ દરમિયાન ચંદ્રનો લાલ રંગ, જેને બ્લડ મૂન કહેવામાં આવે છે, તે એક કુદરતી પ્રક્રિયા છે. જ્યારે પૃથ્વી સૂર્ય અને ચંદ્રની વચ્ચે આવે છે, ત્યારે સૂર્યપ્રકાશ પૃથ્વીના વાતાવરણમાંથી પસાર થાય છે. વાતાવરણમાં રહેલા ધૂળના કણો અને અન્ય વાયુઓ સૂર્યપ્રકાશના વાદળી રંગને વિખેરી નાખે છે, જ્યારે લાલ રંગને ચંદ્ર સુધી પહોંચવા દે છે, જેના કારણે ચંદ્ર લાલ દેખાય છે. આ ઘટનાને કોઈપણ સાધન વગર નરી આંખે જોવી સંપૂર્ણપણે સુરક્ષિત છે.જાથાએ જણાવ્યું કે, ગ્રહણો, ઉલ્કા વર્ષા અને ગ્રહોનું નિરીક્ષણ જેવી ખગોળીય ઘટનાઓ વિશે લોકોને જાગૃત કરવા માટે છેલ્લા દાયકાઓથી સતત પ્રયાસો થઈ રહ્યા છે. આ ગ્રહણ પણ લોકોને વિજ્ઞાન અને અવકાશ વિશે વધુ જાણવા માટે પ્રેરણા આપશે.