જીવનમાં દરેક વ્યક્તિ પાસે સમય હોય છે, પરંતુ તે સમયનો ઉપયોગ કેવી રીતે થાય છે, તે જ વ્યક્તિના વિકાસ અને પ્રગતિની ગાથા લખે છે. એક પ્રખ્યાત સુવિચાર કહે છે: “જે ફુરસદમાં છે એ બીજાના જીવન પર ચર્ચા કરે છે… અને જે વ્યસ્ત છે એ પોતાની જિંદગી સુધારે છે!”
જે લોકો પાસે પોતાના લક્ષ્યો, સપનાઓ કે કોઈ રચનાત્મક કાર્ય માટે સમય નથી હોતો અથવા જેઓ આળસમાં ડૂબેલા હોય છે, તેઓ ઘણીવાર પોતાનો ખાલી સમય અન્ય લોકોના જીવનમાં ડોકિયું કરવામાં, તેમની ટીકા કરવામાં કે બિનજરૂરી વાતોમાં વિતાવે છે. અન્યની ભૂલો કે ખામીઓ પર ધ્યાન કેન્દ્રિત કરવાથી વ્યક્તિના મનમાં નકારાત્મકતા વધે છે.આ સમય અને માનસિક શક્તિનો ઉપયોગ પોતાના વિકાસ માટે થઈ શકતો હતો, જે માત્ર બીજાની ચર્ચામાં વેડફાઈ જાય છે.આવા લોકો જીવનમાં જ્યાં હોય ત્યાં જ રહી જાય છે, કારણ કે તેમનું ધ્યાન હંમેશા બહારની દુનિયા પર હોય છે, પોતાના પર નહીં.
આત્મ-સુધારણા અને પ્રગતિ
બીજી તરફ, જે વ્યક્તિઓ ‘વ્યસ્ત’ હોય છે, તેઓ હંમેશા પોતાના ધ્યેય તરફ ધ્યાન કેન્દ્રિત કરે છે. તેમની વ્યસ્તતા આળસ કે ખાલી બેસી રહેવાની નહીં, પણ સકારાત્મક અને રચનાત્મક કાર્યોમાં હોય છે. વ્યસ્ત વ્યક્તિઓ સતત શીખવા, નવી કુશળતાઓ વિકસાવવા અને પોતાની જાતને ગઈકાલ કરતાં વધુ સારી બનાવવામાં વ્યસ્ત રહે છે. તેમનો સમય યોજના બનાવવા, કાર્ય કરવા અને પરિણામો પ્રાપ્ત કરવામાં વીતે છે, જેના કારણે તેઓ જીવનમાં સફળતાના નવા શિખરો સર કરે છે. જ્યારે કોઈ વ્યક્તિ પોતાના કાર્યમાં મગ્ન હોય છે, ત્યારે તેને બીજાની ચર્ચા કરવાનો સમય જ નથી મળતો.તેહંમેશા સકારાત્મક ઊર્જાથી ભરેલો રહે છે. જીવનની લગામ હાથમાં લો તમારો સમય સૌથી કિંમતી મૂડી છે. તમારે નક્કી કરવાનું છે કે તમે આ મૂડીનું રોકાણ બીજાના જીવન પર ટીપ્પણી કરવામાં કરશો, કે પછી તેને પોતાના જીવનના સુધારણા અને વિકાસમાં લગાવશો.
જો આપણે આપણા લક્ષ્યો પ્રત્યે ગંભીર હોઈએ, તો આપણી પાસે વ્યર્થ વાતોમાં સમય બગાડવાનો સમય નહીં હોય. જીવનમાં સાચી પ્રગતિ અને સંતોષ મેળવવા માટે, ફુરસદ છોડીને સકારાત્મક વ્યસ્તતાને અપનાવવી એ જ સાચો માર્ગ છે.
લેખિકા – દર્શના પટેલ ( નેશનલ મેડાલિસ્ટ)