વલસાડ જિલ્લા લોકલ ક્રાઇમ બ્રાન્ચ (LCB) ની ટીમે નેશનલ હાઇવે નંબર ૪૮ પર પારડી નજીક રેડ કરીને વિદેશી દારૂની હેરાફેરી ઝડપી પાડી છે.
LCB ને મળેલી બાતમીના આધારે, મુંબઈથી સુરત તરફ જઈ રહેલા MH-48-CB-3064 નંબરના ટાટા ઇન્ટ્રા ટેમ્પોને વલ્લભ આશ્રમ સ્કૂલ પાસે રોકીને તપાસ કરવામાં આવી હતી.
ટેમ્પોમાં ફીનાઇલ, હાર્પિક અને એસિડની બોટલોના બોક્સની આડમાં સંતાડેલો ભારતીય બનાવટના વિદેશી દારૂ (વ્હીસ્કી અને બિયર) ના ૪૦ બોક્સ (૧૨૯૬ બોટલ/ટીન) મળી આવ્યા હતા, જેની કિંમત રૂ. ૩,૪૭,૫૨૦/- થાય છે.
ફીનાઇલના બોક્સ અને ટેમ્પો સહિત કુલ રૂ. ૮,૭૦,૯૯૫/- નો પ્રોહીબિશન મુદ્દામાલ કબજે કરવામાં આવ્યો છે.
પોલીસે ટેમ્પો ચાલક બાલાજી ગેલાભાઈ રાવરીયા (ઉં.વ. ૩૮) અને ક્લીનર ધર્મેન્દ્રસિંહ ઉર્ફે ધમો જાડેજા (ઉં.વ. ૨૮), બંને (રહે. ભચાઉ, કચ્છ-ભુજ) ની ધરપકડ કરી છે.
મહારાષ્ટ્રના મુંબઈનો રહેવાસી ‘રમેશભાઈ’ નામનો ઈસમ વોન્ટેડ જાહેર કરાયો છે.
પકડાયેલા આરોપીઓ અને મુદ્દામાલને વધુ તપાસ માટે પારડી પોલીસ સ્ટેશનને સુપ્રત કરવામાં આવ્યા છે.