આ વર્ષે અમદાવાદના હેરિટેજ સ્થાપત્યો અને પોળની સંસ્કૃતિનો લ્હાવો લેવા માટે મોટી સંખ્યામાં NRI પણ ઉમટી પડ્યા છે.અમદાવાદ એટલે ઉત્સવપ્રિય જનતાનું શહેર, અને જ્યારે વાત ઉત્તરાયણની હોય ત્યારે અમદાવાદીઓ માટે એક દિવસ ઓછો પડે! 14મી જાન્યુઆરીએ આકાશને રંગબેરંગી પતંગોથી ભરી દીધા બાદ, આજે ‘વાસી ઉત્તરાયણ’ ના દિવસે પણ હેરિટેજ સિટી અમદાવાદની પોળોમાં અદભૂત માહોલ જોવા મળી રહ્યો છે.
મળતી માહિતી પ્રમાણે વહેલી સવારના સૂર્યકિરણો સાથે જ પતંગરસિયાઓ ફિરકી અને પતંગો લઈને ધાબા પર ચઢી ગયા હતા. ઠંડા પવનની લહેરખીઓ વચ્ચે “એ લપેટ…”, “કાપ્યો છે…” અને “ફિરકી લપેટ…” ના ગગનભેદી નારાઓથી કોટ વિસ્તારના ટેરેસ ગુંજી ઉઠ્યા હતા. મુખ્ય દિવસ કરતા પણ વાસી ઉત્તરાયણે પતંગબાજીનો જંગ વધુ જામ્યો હોય તેવું જણાય છે.
આ વર્ષે અમદાવાદના હેરિટેજ સ્થાપત્યો અને પોળની સંસ્કૃતિનો લ્હાવો લેવા માટે મોટી સંખ્યામાં NRI પણ ઉમટી પડ્યા છે. સાત સમંદર પારથી આવેલા ગુજરાતીઓએ પોળના સાંકડા ધાબા પર રહીને પતંગ ચગાવવાની જે મજા માણી, તે તેમના માટે જીવનભરનું સંભારણું બની ગઈ છે. ઊંધિયું, જલેબી અને ચીકીની મોજ સાથે વિદેશી મહેમાનો પણ ગુજરાતી ગીતોના તાલે ઝૂમતા જોવા મળ્યા હતા.
હેરિટેજ સિટીની સાંકડી ગલીઓમાં પતંગો વેચતા ફેરિયાઓથી લઈને ધાબા પર વાગતા લાઉડસ્પીકરો સુધી, વાસી ઉત્તરાયણનો થનગનાટ ચરમસીમાએ છે. પતંગ કાપવાની રસાકસી અને પેચ લડાવવાની મજામાં વૃદ્ધોથી લઈને બાળકો સુધી સૌ કોઈ મશગૂલ છે. સાંજ પડતા જ આકાશ તુક્કલોથી ઝળહળી ઉઠશે, જે આ ઉત્સવના ઉલ્લાસમાં વધારો કરશે. આમ, હેરિટેજ સિટીમાં વાસી ઉત્તરાયણે સાબિત કરી દીધું છે કે ભલે કેલેન્ડર બદલાય, પણ અમદાવાદીઓનો પતંગ પ્રત્યેનો પ્રેમ ક્યારેય ઓછો થતો નથી.