ભાવનગર: રાજકારણમાં નેતાઓ પક્ષ બદલે એ નવાઈની વાત નથી, પણ પક્ષ બદલીને નાસ્તો પતે એ પહેલા જ પાછા ઘરભેગા થઈ જાય એવી ઘટના ભાવનગરમાં બની છે. ભાવનગરના નેતા સેજલ ગોહેલે ૨ કલાકના ગાળામાં જે રીતે ‘યુ-ટર્ન’ લીધો છે, તેણે રાજકીય વિશ્લેષકોને પણ ચક્કરે ચડાવી દીધા છે.
ઘટનાક્રમ: સવારે કોંગ્રેસનો ખેસ, બપોરે ભાજપનો કેસ!
સવારે ભાવનગરના રાજકારણમાં મોટા સમાચાર વહેતા થયા કે સેજલ ગોહેલે ભાજપને રામ-રામ કરી કોંગ્રેસનો હાથ પકડી લીધો છે. કોંગ્રેસી કાર્યકરો હજુ તો હરખાય અને સોશિયલ મીડિયા પર પોસ્ટ મૂકે ત્યાં જ સમાચાર આવ્યા કે, “ના ભાઈ ના, ભૂલ થઈ ગઈ, હું તો ભાજપમાં જ છું!”
માત્ર ૧૨૦ મિનિટમાં જ હૃદય પરિવર્તન થવાની આ ઘટનાએ તકવાદી નેતાગીરીના વરવા દ્રશ્યો સામે લાવ્યા છે.
‘પાક્કો ગુજરાત’નો આકરો કટાક્ષ:
- સીઝનલ નેતાગીરી: શું આ નેતાઓ માટે પક્ષ એ વિચારધારા છે કે પછી કોઈ ફાસ્ટ ફૂડની દુકાન, જ્યાં મન ફાવે ત્યારે ઓર્ડર બદલી શકાય?
- જનતાની કિંમત શું? જે નેતા ૨ કલાક પોતાના નિર્ણય પર ટકી શકતા નથી, તે પ્રજાના પ્રશ્નો માટે સત્તા સામે શું ટકવાના?
- કોંગ્રેસની ફજેતી: કોંગ્રેસના નેતાઓ જેમને ‘મોટા ગજાના નેતા’ ગણાવી આવકારતા હતા, તેમણે ૨ કલાકમાં જ કોંગ્રેસને ઠેંગો બતાવી દીધો.
તકવાદની પરાકાષ્ઠા
સૂત્રોનું માનીએ તો, ભાજપમાંથી નારાજ થઈને કોંગ્રેસમાં ગયેલા સેજલ ગોહેલને કદાચ ૨ કલાકમાં જ ‘ઉપરથી’ ફોન આવી ગયો અથવા તો ભવિષ્ય ધૂંધળું દેખાયું. પરિણામ એ આવ્યું કે ગયેલો લાલ ભાઈ ગાળો ખાઈને પાછો આવ્યો!
“રાજકારણ હવે સિદ્ધાંતોનું નહીં, પણ સગવડનું સાધન બની ગયું છે. સવારે જે પક્ષને ગાળો ભાંડતા હોય, બપોરે એ જ પક્ષના ગુણગાન ગાવા માટે કેટલી નિર્લજ્જતા જોઈએ?”
પાક્કો ગુજરાત વ્યુ:
આવી તકવાદી નેતાગીરી જ લોકશાહીને નબળી પાડે છે. મતદારોએ હવે એ જોવું પડશે કે તેઓ નેતા ચૂંટે છે કે પક્ષ પલટાના ખેલાડી? સેજલ ગોહેલનો આ કિસ્સો ગુજરાતના રાજકારણના ઇતિહાસમાં ‘ફાસ્ટેસ્ટ રિટર્ન ટિકિટ’ તરીકે યાદ રખાશે.
અહેવાલ: બ્યુરો રિપોર્ટ, પાક્કો ગુજરાત