જામનગર શહેરના હાપા સ્ટેશન રોડ વિસ્તારમાંથી મળેલ એક મુકબધિર તથા માનસિક રીતે અશક્ત બાળકને પંચકોશી એ. ડિવિઝન પોલીસ દ્વારા સુરક્ષિત રીતે સંભાળી યોગ્ય સંસ્થાને સોંપવાની માનવતાપૂર્ણ કામગીરી હાથ ધરવામાં આવી છે.
ગત તા.06.04.2026ના રોજ અંદાજે બપોરના સમયે પંચકોશી એ. ડિવિઝન પોલીસ સ્ટેશન વિસ્તારના હાપા સ્ટેશન રોડ પરથી એક અજાણ્યો બાળક મળી આવ્યો હતો. બાળક બોલી શકતો ન હોવાથી તેની ઓળખ અંગે મુશ્કેલી ઊભી થઈ હતી. પોલીસ સ્ટાફ દ્વારા તાત્કાલિક કાર્યવાહી હાથ ધરી બાળકને સુરક્ષિત સ્થાને લઈ જઈ તપાસ શરૂ કરવામાં આવી.
પોલીસ દ્વારા બાળકને મુકબધિર શાળા, લીમડાલાઇન ખાતે લઈ જઈ તેના હાવભાવ અને વર્તન પરથી બાળક મુકબધિર હોવા ઉપરાંત માનસિક રીતે પણ અશક્ત હોવાનું પ્રાથમિક રીતે જણાયું હતું. ત્યારબાદ બાળકના જમણા હાથ પર ટેટૂ તરીકે લખાયેલ મોબાઇલ નંબર મળ્યો, જેના આધારે સંપર્ક સાધતા બાળકની માતા સાથે વાતચીત થઈ હતી.બાળકની માતાએ જાણકારી આપી કે બાળક રાજકોટ ખાતે આવેલી “હીના ફાઉન્ડેશન” નામની સંસ્થામાં છેલ્લા એક વર્ષથી રહેતો હતો, અને રાત્રે ત્યાંથી કોઈને જાણ કર્યા વગર બહાર નીકળી ગયો હતો.
આ માહિતીના આધારે પંચકોશી એ. ડિવિઝન પોલીસે તાત્કાલિક હીના ફાઉન્ડેશન સાથે સંપર્ક સાધ્યો અને સંસ્થાના સંચાલકોને જામનગર ખાતે બોલાવ્યા હતા, ત્યારબાદ બાળકને ચિલ્ડ્રન હોમ, જામનગર ખાતે રાખી જરૂરી કાયદેસરની કાર્યવાહી પૂર્ણ કરવામાં આવી. બાદમાં તમામ દસ્તાવેજોની ચકાસણી કર્યા પછી બાળકને હીના ફાઉન્ડેશન, રાજકોટના સંચાલકોને સોંપવામાં આવ્યો હતો.
આ સમગ્ર કામગીરી પોલીસ ઇન્સ્પેક્ટરના માર્ગદર્શન હેઠળ તથા પોલીસ સ્ટાફના સક્રિય સહયોગથી સફળતાપૂર્વક પૂર્ણ કરવામાં આવી છે. જામનગર પોલીસની આ કામગીરી માનવતાનું ઉત્તમ ઉદાહરણ પૂરું પાડે છે.