ભારતીય ક્રિકેટ ટીમના અનુભવી અને દિગ્ગજ ફાસ્ટ બોલર મોહમ્મદ શમીના ભવિષ્યને લઈને ક્રિકેટ વર્તુળોમાં ફરી એકવાર ચર્ચાઓએ જોર પકડ્યું છે.આગામી ન્યૂઝીલેન્ડ પ્રવાસ માટે ભારતીય ટીમની જાહેરાત કરવામાં આવી છે, પરંતુ આશ્ચર્યજનક રીતે શમીને ટેસ્ટ, વનડે કે T20 ત્રણેયમાંથી એક પણ ફોર્મેટમાં સ્થાન આપવામાં આવ્યું નથી.ન્યૂઝીલેન્ડ પ્રવાસની ટીમમાંથી પત્તું કપાતાં જ ચાહકોમાં સવાલો ઊભા થયા છે કે શું હવે શમીની આંતરરાષ્ટ્રીય કરિયર ખતમ થઈ ગઈ છે? જોકે,ટીમમાં પસંદગી ન થવાનો અર્થ એવો બિલકુલ નથી કે તેમણે નિવૃત્તિ લઈ લીધી છે.
ટીમ ઇન્ડિયા હવે યુવા એક્સ-ફેક્ટર્સ પર રમી રહી છે દાવ
ભારતીય પસંદગીકારો હવે ભવિષ્યની મજબૂત ટીમ તૈયાર કરવા માટે યુવા ફાસ્ટ બોલરો પર મોટો દાવ લગાવી રહ્યા છે.ન્યૂઝીલેન્ડ પ્રવાસ માટે ટીમમાં ગુરનૂર બ્રાર,આકિબ નબી,અંશુલ કંબોજ અને પ્રસિદ્ધ કૃષ્ણા જેવા નવયુવાન ફાસ્ટ બોલરોને મોકો આપવામાં આવ્યો છે.બીજી તરફ,36 વર્ષના મોહમ્મદ શમી વધતી ઉંમર અને ફિટનેસના પડકારોનો સામનો કરી રહ્યા છે.તાજેતરમાં ભુવનેશ્વર કુમારની ટી20માં વાપસીના અહેવાલો વચ્ચે શમીની આ ગેરહાજરી વધુ ચર્ચાસ્પદ બની છે.પરંતુ માત્ર ઉંમરના આધારે આ ઘાતક બોલરની વાપસીની આશાઓ નકારી શકાય નહીં,કારણ કે બોર્ડ તેમના વર્તમાન ફોર્મ અને લાંબા ગાળાની ઉપલબ્ધતા પર નજર રાખી રહ્યું છે.
ઘરેલુ ક્રિકેટમાં શમીનો ધમાકેદાર ફ્લોપ શો કે વિકેટોનો વરસાદ
આંતરરાષ્ટ્રીય ટીમની બહાર હોવા છતાં મોહમ્મદ શમીએ ઘરેલુ ક્રિકેટમાં રમીને પસંદગીકારોના દરવાજા ખખડાવવાનું ચાલુ રાખ્યું છે. ઘરેલુ મેચોમાં તેમનો તાજેતરનો રેકોર્ડ અદ્ભુત રહ્યો છે:
રણજી ટ્રોફી: 7 મેચમાં 37 વિકેટ
વિજય હજારે ટ્રોફી: 7 મેચમાં 15 વિકેટ
સૈયદ મુશ્તાક અલી ટ્રોફી: 7 મેચમાં 16 વિકેટ
દુલીપ ટ્રોફી ફાઇનલ: 7 વિકેટ
ચેમ્પિયન્સ ટ્રોફી 2025 ની ફાઇનલ બાદ ટીમથી દૂર
મોહમ્મદ શમી ભારત માટે છેલ્લે વર્ષ 2025ની ચેમ્પિયન્સ ટ્રોફીની ફાઇનલમાં ન્યૂઝીલેન્ડ સામે રમતા જોવા મળ્યા હતા.તે હાઈ-વોલ્ટેજ મેચમાં તેમણે 74 રન આપીને 1 વિકેટ મેળવી હતી.તે ફાઇનલ બાદ તેઓ ભારતીય જર્સીમાં જોવા મળ્યા નથી.પરંતુ એકાદ બે મેચના નબળા પ્રદર્શનથી શમી જેવા મેચ વિનર ખેલાડીની આખી કારકિર્દીનું મૂલ્યાંકન કરવું અન્યાયી ગણાશે. શમીએ ભૂતકાળમાં ભારતને અનેક હારેલી મેચો જીતાડી છે.હાલમાં તેમણે નિવૃત્તિઅંગે કોઈ સત્તાવાર જાહેરાત કરી નથી.જો તેઓ પોતાની ફિટનેસ સાબિત કરે અને ઘરેલુ ક્રિકેટમાં આવું જ પ્રદર્શન ચાલુ રાખશે,તો આગામી સમયમાં ટીમ ઇન્ડિયામાં તેમની વાપસી થઈ શકે છે.ક્રિકેટ ચાહકોએ અત્યારથી કોઈ નિષ્કર્ષ પર પહોંચવાને બદલે શમીની ફિટનેસ અપડેટની રાહ જોવી જોઈએ