અમદાવાદમાં તાજેતરમાં બનેલી દુઃખદ ઘટના બાદ રાજ્યભરની શાળાઓમાં બાળકોની સુરક્ષા અંગે ચિંતા વધી છે, ત્યારે વાગરા તાલુકાની જુંજેરા વિદ્યાલયે આ સંવેદનશીલ પરિસ્થિતિમાં એક આદર્શ ઉદાહરણ પૂરું પાડ્યું છે. આ શાળાએ માત્ર સીસીટીવી કેમેરા પર નિર્ભર રહેવાને બદલે વિદ્યાર્થીઓની સુરક્ષા અને ચારિત્ર્ય નિર્માણ માટે કેટલીક અનોખી પહેલ કરી છે, જે અન્ય શાળાઓ માટે પણ પ્રેરણાદાયક બની રહી છે.
આચાર્ય હિતેશ કુમારના માર્ગદર્શન હેઠળ, જુંજેરા વિદ્યાલયમાં છેલ્લા બે વર્ષથી વિદ્યાર્થીઓની સુરક્ષા અને શિસ્ત જાળવવા માટે દરરોજ પ્રાર્થના બાદ બાળકોને એક ખાસ પ્રતિજ્ઞા લેવડાવવામાં આવે છે. આ પ્રતિજ્ઞા દ્વારા વિદ્યાર્થીઓ શિસ્તપૂર્વક વર્તન કરવાનો અને એવું કોઈ કામ ન કરવાનો સંકલ્પ લે છે, જેનાથી તેમના માતા-પિતા અને શાળાનું નામ ખરાબ થાય.
આ ઉપરાંત, શાળામાં વિદ્યાર્થીઓની બેગનું નિયમિત રીતે અચાનક ચેકિંગ કરવામાં આવે છે, જેથી તેઓ કોઈ અનિચ્છનીય વસ્તુઓ ન લાવે. ધોરણ-૩ થી ઉપરના દરેક વર્ગખંડમાં એક ગુપ્ત મોનિટરની નિમણૂક કરવામાં આવી છે, જે વિદ્યાર્થીઓની ગેરવર્તણૂક કે વ્યસન જેવી બાબતોની માહિતી આચાર્યને આપે છે. જે વિદ્યાર્થીઓ પોતાની વાત ખુલીને કહી શકતા નથી, તેઓ ચિઠ્ઠી દ્વારા પોતાની સમસ્યા જણાવી શકે તે માટે આચાર્યની ઓફિસમાં ‘વિદ્યાર્થી સૂચન ફાઈલ’ પણ રાખવામાં આવી છે. સીસીટીવી કેમેરા ઉપરાંત, શિક્ષકોને ગ્રાઉન્ડ ડ્યુટી સોંપવામાં આવી છે જેથી તેઓ સતત વિદ્યાર્થીઓની ગતિવિધિઓ પર નજર રાખી શકે.
શાળાની આ અનોખી પહેલને વાલીઓ અને વિદ્યાર્થીઓ તરફથી સારો પ્રતિભાવ મળ્યો છે. અનેક વાલીઓએ જણાવ્યું છે કે આવા સંવેદનશીલ સમયે શાળાએ જે જવાબદારીપૂર્વકનો અભિગમ અપનાવ્યો છે તે ખરેખર અનુકરણીય છે.
શાળાની આ સફળતાનો શ્રેય આચાર્ય હિતેશ કુમાર, શાળાના ટ્રસ્ટી મંડળ અને તમામ શિક્ષકોના સામૂહિક પ્રયાસોને જાય છે. આશા રાખવામાં આવે છે કે જુંજેરા વિદ્યાલયના આ પ્રશંસનીય પ્રયોગમાંથી પ્રેરણા લઈને અન્ય શાળાઓ પણ પોતાના વિદ્યાર્થીઓની સુરક્ષા અને ચારિત્ર્ય નિર્માણ માટે સક્રિય પગલાં લેશે, જેથી અમદાવાદ જેવી દુર્ઘટનાઓને બનતી અટકાવી શકાય.