અમદાવાદમાં ઉનાળાનો પારો 40 ડિગ્રીને પાર કરી રહ્યો છે, ત્યારે રસ્તા વચ્ચે ઊભા રહીને વાહનવ્યવહારનું સંચાલન કરતા ટ્રાફિક પોલીસ કર્મીઓની હાલત કફોડી બની જાય છે. અતિશય ગરમી અને હીટવેવના કારણે પોલીસ કર્મીઓના શારીરિક અને માનસિક સ્વાસ્થ્ય પર માઠી અસર પડતી હોય છે. આ સમસ્યાના ઉકેલ રૂપે, અમદાવાદ ટ્રાફિક પોલીસ દ્વારા એક અત્યંત પ્રશંસનીય ‘પાયલોટ પ્રોજેક્ટ’ શરૂ કરવામાં આવ્યો છે, જેનું નામ છે ‘કૂલ જેકેટ’ છે.
પકવાન ચાર રસ્તાથી થઈ શરૂઆત
સેવાભાવી સંસ્થા ‘મહિલા હાઉસિંગ ટ્રસ્ટ’ (MHT) અને અમદાવાદ મ્યુનિસિપલ કોર્પોરેશન (AMC) ના સહયોગથી આ નવીન પહેલ કરવામાં આવી છે. હાલ પાયલોટ પ્રોજેક્ટ હેઠળ શહેરના સૌથી વ્યસ્ત એવા એસ.જી. હાઈવે પરના પકવાન ચાર રસ્તા ખાતે ફરજ બજાવતા પોલીસ કર્મીઓને આ સ્પેશિયલ કૂલિંગ જેકેટ્સ આપવામાં આવ્યા છે.
કેવી રીતે કામ કરે છે આ ‘AC જેકેટ’?
આ કોઈ સામાન્ય જેકેટ નથી, પણ ટેકનોલોજી અને આરામનું અનોખું મિશ્રણ છે. આ જેકેટની ડિઝાઈન અને કાર્યપદ્ધતિ તેને ખાસ બનાવે છે. જેકેટમાં પાવર બેંક કનેક્ટ કર્યા બાદ એક ‘ઓન-ઓફ’ બટન આપવામાં આવ્યું છે. જેવું બટન દબાવો એટલે જેકેટની અંદર લાગેલા પંખા (Fans) શરૂ થઈ જાય છે. આ જેકેટ પહેરવાથી શરીરનું તાપમાન આસપાસના વાતાવરણ કરતા આશરે 5 થી 7 ડિગ્રી જેટલું નીચું રહે છે. જેકેટની ચેન બંધ કરતા જ અંદરની હવા બહાર નીકળતી નથી અને આખા શરીરમાં ગોળ-ગોળ ફરતી રહે છે. જેના કારણે પરસેવો વળતો નથી અને ઈરીટેશન થતું નથી. જેકેટમાં ખાસ આઈસ કોલરની સુવિધા છે, જેને પલાળીને રાખવાથી ઠંડી હવા ગળા અને માથા સુધી પહોંચે છે, જે હીટ સ્ટ્રોક (લૂ લાગવી) સામે રક્ષણ આપે છે.
ભવિષ્યમાં સમગ્ર શહેરમાં અમલની શક્યતા
આ પ્રોજેક્ટ અત્યારે ‘અમદાવાદ હીટ એક્શન પ્લાન’ હેઠળ કાર્યરત છે. મહિલા હાઉસિંગ ટ્રસ્ટ દ્વારા ટ્રાફિક પોલીસ કર્મીઓ પાસેથી આ જેકેટની અસરકારકતા અને ઉપયોગની સરળતા વિશે પ્રતિસાદ (Feedback) મેળવવામાં આવશે. જો આ પ્રયોગ સફળ રહેશે, તો આગામી દિવસોમાં શહેરના અન્ય વ્યસ્ત સર્કલો પર ફરજ બજાવતા પોલીસ કર્મીઓ અને ફ્રન્ટલાઈન વર્કરો માટે પણ આ જેકેટનો વ્યાપક ઉપયોગ કરવામાં આવશે.
ગરમી સામે લડવા નવીન અભિગમ
નોંધનીય છે કે, મહિલા હાઉસિંગ ટ્રસ્ટ છેલ્લા ઘણા વર્ષોથી ક્લાયમેટ ચેન્જ અને હીટ રિઝિલિયન્સ પર કામ કરી રહ્યું છે. આ કુલ જેકેટ માત્ર પોલીસ કર્મીઓને આરામ જ નથી આપતા, પરંતુ તેમની કાર્યક્ષમતામાં પણ વધારો કરે છે. હલકા વજનનું અને ટકાવ ફેબ્રિક ધરાવતું આ જેકેટ લાંબા સમય સુધી આઉટડોર ફરજ બજાવતા કર્મચારીઓ માટે આશીર્વાદરૂપ સાબિત થશે. અમદાવાદ ટ્રાફિક પોલીસની આ પહેલથી હવે ગરમીના પ્રકોપ વચ્ચે પણ પોલીસ કર્મીઓ વધુ ઉત્સાહ અને સુરક્ષા સાથે પોતાની સેવા આપી શકશે.