શહેરના નર્મદામૈયા બ્રિજ પર વધતા અકસ્માતોને ધ્યાનમાં રાખીને ભરૂચ પોલીસે એક મહત્વનો નિર્ણય લીધો છે. આગામી 5 ઓગસ્ટથી 4 નવેમ્બર સુધી આ બ્રિજ પરથી તમામ પ્રકારના ભારે અને અતિ ભારે વાહનો જેવા કે ખાનગી બસ, ટ્રક, ટેમ્પો અને ટેન્કરોની અવરજવર પર સંપૂર્ણ પ્રતિબંધ મૂકવામાં આવ્યો છે. આ નિર્ણયનો મુખ્ય હેતુ નાગરિકોની સુરક્ષા સુનિશ્ચિત કરવાનો અને અકસ્માતોની સંખ્યામાં ઘટાડો કરવાનો છે.
સ્થાનિક નાગરિકો તરફથી મળતી ફરિયાદો અને વારંવાર બનતી અકસ્માતની ઘટનાઓને કારણે આ પગલું ભરવામાં આવ્યું છે. રાત્રિના સમયે ભારે વાહનોની અવરજવરને કારણે નાના-મોટા અકસ્માતો થતા હોવાનું સામે આવ્યું હતું, જેને ધ્યાનમાં રાખીને આ પ્રતિબંધ લાગુ કરવામાં આવ્યો છે.
જોકે, આ પ્રતિબંધમાંથી આપત્કાલીન સેવાઓ સાથે સંકળાયેલા વાહનોને મુક્તિ આપવામાં આવી છે. જેમાં એમ્બ્યુલન્સ, ફાયર બ્રિગેડના વાહનો અને ગુજરાત રાજ્યની એસ.ટી. બસોનો સમાવેશ થાય છે. આ વાહનો રાબેતા મુજબ બ્રિજનો ઉપયોગ કરી શકશે.
પોલીસ દ્વારા જાહેર કરવામાં આવેલા આ આદેશનો ભંગ કરનાર વ્યક્તિઓ સામે કાયદેસરની કાર્યવાહી કરવામાં આવશે. પોલીસને આશા છે કે આ નિર્ણયથી નર્મદામૈયા બ્રિજ પર અકસ્માતોની સંખ્યામાં નોંધપાત્ર ઘટાડો થશે અને ટ્રાફિક વ્યવસ્થા વધુ સુચારુ બનશે.
REPOTER : કેતન મહેતા, ભરૂચ