ભરૂચ પોલીસની પેરોલ ફર્લો સ્ક્વોડે બળાત્કાર અને અપહરણ જેવા ગંભીર ગુનામાં સજા ભોગવતા અને છેલ્લા ૮ વર્ષથી પેરોલ જમ્પ કરીને ફરાર થયેલા આરોપીને પોલીસે રાજસ્થાનના અજમેર ખાતેથી ઝડપી પાડ્યો છે.
ભરૂચનો રહેવાસી યુનુશ અલી ઉસ્માન ગની વ્હોરા (પાકા કામનો કેદી) ગાયકવાડ હવેલી પોલીસ સ્ટેશનમાં નોંધાયેલા ગુનામાં સજા સંભળાવ્યા બાદ અમદાવાદ મધ્યસ્થ જેલમાં સજા ભોગવતો હતો.
આરોપી ૩૧/૦૮/૨૦૧૭ ના રોજ ૧૦ દિવસની પેરોલ રજા પર છૂટ્યો હતો, પરંતુ ૧૧/૦૯/૨૦૧૭ ના રોજ રજા પૂરી થવા છતાં જેલ ખાતે હાજર થયો નહોતો.
ફરાર થયા બાદ તેની વિરુદ્ધ ભરૂચ શહેર ‘બી’ ડીવી. પોલીસ સ્ટેશનમાં પ્રિઝન એક્ટ હેઠળ ગુનો પણ નોંધાયો હતો.
ભરૂચ પેરોલ ફર્લો સ્ક્વોડને બાતમી મળી હતી કે, યુનુશ વ્હોરા રાજસ્થાનના જયપુરથી અજમેર આવી રહ્યો છે. આ બાતમીના આધારે ભરૂચની ટીમે રાજસ્થાનમાં તપાસ કરી અજમેર બસ સ્ટેન્ડ ખાતેથી આરોપી યુનુશ વ્હોરાને હસ્તગત કર્યો હતો.
આરોપીની ધરપકડ કરીને તેને આગળની કાયદેસરની કાર્યવાહી માટે ભરૂચ શહેર ‘બી’ ડીવી. પોલીસ સ્ટેશનને સોંપવામાં આવ્યો છે.