ઝુંડાલ વિસ્તારમાં બાથરૂમના પી.વી.સી. દરવાજાના કામના બાકી નીકળતા રૂપિયાની ઉઘરાણી કરવા બાબતે ફનચરની દુકાન ચલાવતા વેપારી પર પિતા-પુત્રએ લાકડાના ધોકા વડે હુમલો કરી ગંભીર ઇજા પહોંચાડી હોવાની ઘટના સામે આવી છે. આ મામલે અડાલજ પોલીસ સ્ટેશનમાં ગુનો નોંધવામાં આવ્યો છે.
આ ઘટના અંગે પોલીસ સૂત્રોમાંથી મળતી વિગતો પ્રમાણે મૂળ રાજસ્થાનના અને હાલ અડાલજ ખાતે રહેતો સુનીલ શ્રવણભાઈ ચૌધરી ઝુંડાલમાં શ્રેયાંસ ફનચર નામની દુકાન ભાગીદારીમાં ચલાવે છે. એક માસ પહેલા વિવાન એકઝોરા ફ્લેટમાં રહેતા બાબુલાલજી તુલસીદાસ સુથારે તેમના ઘરે ૮,૦૦૦ રૂપિયામાં બાથરૂમના પી.વી.સી. દરવાજા બનાવવાનું કામ આપ્યું હતું. જે પૈકી ૪,૦૦૦ રૂપિયા એડવાન્સ આપ્યા હતા અને બાકીના ૪,૦૦૦ રૂપિયા કામ પૂરું થયા બાદ આપવાનું નક્કી કરવામાં આવ્યું હતું. જેથી સુનીલ દ્વારા વારંવાર બાકી પૈસાની માંગણી કરવા છતાં બાબુલાલ દ્વારા નાણાં આપવામાં આવતા નહોતા. ત્યારે ગઈકાલે સાંજના આશરે ચારેક વાગ્યે સુનીલ અને તેમના ભાગીદાર પંકજભાઈ દુકાન પર હાજર હતા ત્યારે બાબુલાલ અને તેમનો પુત્ર ભેરૂ ત્યાં આવ્યા હતા. જેથી પૈસા માંગતા હુ તમોને કોઇ પૈસા આપવાનો નથી તેમ કહી ગાળાગાળી શરૂ કરી હતી. તકરાર વધતા પિતા-પુત્રએ સુનીલ સાથે ઝપાઝપી કરી ગડદાપાટુનો માર માર્યો હતો. આ દરમિયાન બાબુલાલના પુત્ર ભેરૂએ લાકડાના ધોકા વડે સુનીલના માથાના ભાગે હુમલો કર્યો હતો. જેના કારણે તેને લોહી નીકળવા લાગ્યું હતું અને તે નીચે પડી ગયો હતો. હુમલો કર્યા બાદ બંનેએ હવે પૈસાની માંગણી કરશો તો જાનથી મારી નાખીશું તેવી ધમકી આપી ત્યાંથી નાસી ગયા હતા.આ મામલે અડાલજ પોલીસે પિતા પુત્ર સામે ગુનો દાખલ કરી વધુ તપાસ હાથ ધરી છે.