વાગરા તાલુકાના પહાજથી રોજા ટંકારીયા માર્ગ પર રાત્રિના સમયે એક વિશાળ અજગર રસ્તો ઓળંગી રહ્યો હતો. અચાનક રસ્તા પર અજગરને જોઈને અનેક વાહનચાલકોએ પોતાના વાહનો થોભાવી દીધા હતા અને આ દ્રશ્યને પોતાના મોબાઈલમાં કેદ કર્યું હતું. અજગરનું કદ ઘણું મોટું હોવાથી વાહનચાલકો ગભરાઈ ગયા હતા, જોકે ભયની સાથે સાથે આ અદ્ભુત દ્રશ્ય જોવાનું કુતૂહલ પણ જોવા મળ્યું હતું.
આ ઘટનાનો વિડીયો હાલ સોશિયલ મીડિયા પર વાયરલ થઈ રહ્યો છે. વન્યજીવ નિષ્ણાતોના મતે, અજગર સ્વભાવે શાંત હોય છે, પરંતુ જો તેને કોઈ પ્રકારનો ભય લાગે તો તે હુમલો પણ કરી શકે છે. તેથી, આવા સમયે સાવચેતી રાખવી ખૂબ જ જરૂરી છે. આ ઘટનાએ સાબિત કર્યું છે કે વાગરા તાલુકાના આ વિસ્તારમાં વન્યજીવોની અવરજવર સામાન્ય છે.
સ્થાનિકો અને વાહનચાલકોને અપીલ છે કે વન્યજીવોને નુકસાન પહોંચાડ્યા વગર તેમને સુરક્ષિત રીતે પસાર થવા દે. વન વિભાગને પણ આ માર્ગ પર આવા વન્યજીવોની હિલચાલ અંગે ધ્યાન રાખવા અપીલ કરવામાં આવી છે.