જૂનાગઢ શહેરમાં નશાકારક પદાર્થોના ગેરકાયદેસર વેચાણ સામે પોલીસે લાલ આંખ કરી છે. શહેરના A ડિવિઝન પોલીસ સ્ટાફે બાતમીના આધારે દરોડો પાડીને પ્રતિબંધિત કફ સિરપનો મોટો જથ્થો ઝડપી પાડ્યો છે. યુવાધનને નશાના રવાડે ચઢાવતા આ કાળા કારોબારનો પર્દાફાશ કરીને પોલીસે એક શખ્સની ધરપકડ કરી કાયદેસરની કાર્યવાહી હાથ ધરી છે.
જૂનાગઢ પોલીસને ચોક્કસ માહિતી મળી હતી કે શહેરમાં અમુક વિસ્તારોમાં નશાકારક કફ સિરપનું ગેરકાયદેસર વેચાણ થઈ રહ્યું છે. આ બાતમીના આધારે A ડિવિઝન પોલીસે વોચ ગોઠવીને ઇબ્રાહિમ ઉર્ફે ટીટો નામના શખ્સને દબોચી લીધો હતો. પોલીસની આ ત્વરિત કાર્યવાહીથી નશાના સોદાગરોમાં ફફડાટ વ્યાપી ગયો છે. પ્રાથમિક પૂછપરછમાં આ શખ્સ લાંબા સમયથી આ પ્રવૃત્તિમાં સંડોવાયેલો હોવાનું બહાર આવ્યું છે.
મોટી સંખ્યામાં મુદ્દામાલ જપ્ત
પોલીસ દરોડા દરમિયાન આરોપી પાસેથી REXO-T નામની પ્રતિબંધિત કફ સિરપની કુલ 190 નંગ બોટલો મળી આવી હતી. આ જથ્થો કોઈ પણ પ્રકારના લાયસન્સ કે ડોક્ટરના પ્રિસ્ક્રિપ્શન વગર વેચવામાં આવી રહ્યો હતો. પોલીસે સિરપની બોટલો, રોકડ રકમ અને મોબાઈલ ફોન સહિત કુલ ₹44,900નો મુદ્દામાલ કબ્જે કર્યો છે. આ સિરપનો ઉપયોગ નશા તરીકે કરવામાં આવતો હોવાની આશંકા સેવાઈ રહી છે.
NDPS એક્ટ હેઠળ કડક કાર્યવાહી
આરોપી ઇબ્રાહિમ ઉર્ફે ટીટો સામે પોલીસે NDPS (Narcotic Drugs and Psychotropic Substances) એક્ટ હેઠળ ગુનો નોંધી વધુ તપાસ હાથ ધરી છે. જૂનાગઢના ડીવાયએસપી હિતેશ ધાંધલ્યાએ જણાવ્યું હતું કે, આ મામલે ઔષધી નિયંત્રણ વિભાગ (Food and Drugs Department) ને પણ જાણ કરવામાં આવશે જેથી આ જથ્થો ક્યાંથી આવ્યો અને તેની સપ્લાય ચેઈન ક્યાં સુધી જોડાયેલી છે તેની વિગતવાર તપાસ થઈ શકે.
યુવાધનને બચાવવા પોલીસની નેમ
જૂનાગઢ પોલીસ દ્વારા નશા મુક્ત શહેર બનાવવા માટે સતત પ્રયાસો કરવામાં આવી રહ્યા છે. ડીવાયએસપી હિતેશ ધાંધલ્યાએ મીડિયા સાથેની વાતચીતમાં જણાવ્યું હતું કે, આવા નશાકારક પદાર્થોનું વેચાણ કરનારા તત્વોને કોઈ પણ સંજોગોમાં છોડવામાં આવશે નહીં. આગામી દિવસોમાં પણ આ પ્રકારની ડ્રાઈવ ચાલુ રહેશે જેથી શહેરના યુવાનોને નશાની ગર્તામાં ધકેલાતા બચાવી શકાય.