વાગરાના સારણ રોડ પર આવેલી ફેઈથ કેલવરી સેકન્ડરી સ્કૂલ ખાતે તાજેતરમાં એક અનોખી ‘સ્ટુડન્ટ લેડ કોન્ફરન્સ’ (SLC) નું સફળ આયોજન કરવામાં આવ્યું હતું. આ કાર્યક્રમે શિક્ષણને માત્ર ભણતર પૂરતું સીમિત ન રાખતા, વિદ્યાર્થીઓને પોતાના જ્ઞાન અને કૌશલ્યને સ્વતંત્રતાપૂર્વક રજૂ કરવાની તક પૂરી પાડી. આ કોન્ફરન્સમાં નર્સરીથી લઈને ધોરણ ૮ સુધીના વિદ્યાર્થીઓએ સ્વયં નેતૃત્વ લઈને વિવિધ વિષયો પર પ્રોજેક્ટ્સ, મોડેલ્સ અને ચાર્ટ્સ રજૂ કર્યા હતા.
આ કોન્ફરન્સની સૌથી ખાસ વાત એ હતી કે, સમગ્ર રજૂઆત અંગ્રેજી ભાષામાં કરવામાં આવી હતી. નાના વિદ્યાર્થીઓ પણ જે આત્મવિશ્વાસ સાથે પોતાના પ્રોજેક્ટ્સ વિશે સમજાવી રહ્યા હતા તે જોઈને ઉપસ્થિત વાલીઓ અને મહેમાનો પ્રભાવિત થયા હતા. તેમના પ્રોજેક્ટ્સમાં વિજ્ઞાન, સામાજિક વિજ્ઞાન અને ગણિત જેવા વિષયોનું અદ્ભુત સંકલન જોવા મળ્યું હતું.
આ કાર્યક્રમની સફળતાનો સંપૂર્ણ શ્રેય શાળાના એજ્યુકેશન ડિરેક્ટર ડૉ. હિના અને સમગ્ર શિક્ષકગણને જાય છે. તેમણે વિદ્યાર્થીઓને પ્રોત્સાહિત કરીને તેમના વિચારોને વાસ્તવિકતામાં બદલવામાં મદદ કરી. વાલીઓએ પણ શાળાના આ પ્રયાસની પ્રશંસા કરતાં જણાવ્યું કે આવા કાર્યક્રમોથી બાળકોમાં જ્ઞાનની સાથે સાથે આત્મવિશ્વાસ, સંચાર કૌશલ્ય અને ટીમવર્ક જેવી કુશળતાઓનો પણ વિકાસ થાય છે.
વર્ષ ૨૦૦૮ માં સ્થપાયેલી ફેઈથ કેલવરી સ્કૂલ માત્ર પરીક્ષામાં સારા ગુણ મેળવવા પર જ ધ્યાન કેન્દ્રિત કરતી નથી, પરંતુ વિદ્યાર્થીઓના સર્વાંગી વિકાસ માટે પણ પ્રતિબદ્ધ છે. આ શાળાએ ધોરણ ૧૦માં સતત ૧૦૦% પરિણામ આપીને પોતાની શૈક્ષણિક ગુણવત્તા સાબિત કરી છે. આ કોન્ફરન્સ એ વાતનું ઉત્તમ ઉદાહરણ પૂરું પાડે છે કે શિક્ષણ માત્ર પાઠ્યપુસ્તકો સુધી સીમિત નથી, પરંતુ તે એક સર્વાંગી વિકાસની પ્રક્રિયા છે જે વિદ્યાર્થીઓના ભવિષ્યને ઉજ્જવળ બનાવે છે.