મહેસાણા જિલ્લાના કડીમાં કાયદો અને વ્યવસ્થાની સ્થિતિ કથળી હોવાના ગંભીર અહેવાલ સામે આવ્યા છે, જ્યાં જાહેરમાં જ એક યુવક પર જીવલેણ હુમલો કરવામાં આવ્યો હતો અને બાદમાં તેનું અપહરણ કરવામાં આવ્યું હતું. આ સનસનાટીભરી ઘટના કડીના એક હેર સલૂનમાં બની હતી, જ્યાં એક યુવક વાળ કપાવવા માટે બેઠો હતો. તે જ સમયે ત્રણ જેટલા હુમલાખોરો ત્યાં ધસી આવ્યા હતા અને યુવક પર તલવાર તથા પાઈપ જેવા ઘાતક હથિયારો વડે આડેધડ હુમલો કર્યો હતો.
જાહેરમાં ગુંડાગીરી
હુમલાનું પ્રાથમિક કારણ ધંધા બાબતની જૂની અદાવત હોવાનું જાણવા મળ્યું છે. હુમલાખોરોએ યુવકને ઈજાગ્રસ્ત કર્યા બાદ જાહેરમાં જ તેને એક બ્લુ કલરની કારમાં બેસાડીને તેનું અપહરણ કર્યું હતું, જેના પગલે સમગ્ર પંથકમાં ભયનો માહોલ છવાયો હતો. ઈજાગ્રસ્ત યુવકને તાત્કાલિક સારવાર અર્થે હોસ્પિટલ ખસેડવામાં આવ્યો છે. આ મામલે કડી પોલીસે તાત્કાલિક કાર્યવાહી હાથ ધરી છે અને હુમલો કરનારા ત્રણ અજાણ્યા શખ્સો વિરુદ્ધ ગુનો નોંધીને વધુ તપાસ હાથ ધરી છે, પરંતુ જાહેરમાં બનેલી આ ઘટનાથી કાયદાની સ્થિતિ પર મોટો સવાલ ઊભો થયો છે.