મહેસાણાના કડી તાલુકાના વડું ગામમાં એક ચોંકાવનારી હત્યાની ઘટના સામે આવી છે, જેમાં પ્રેમ સંબંધનો અંત લાવવાની ઈચ્છા વ્યક્ત કરનાર 47 વર્ષીય મહિલાની તેના જ પ્રેમીએ કરપીણ હત્યા કરી દીધી છે. ડાભી સેધાજી ખેંગારજી નામના શખ્સે આવેશમાં આવીને ભરી બજારમાં મહિલા પર હુમલો કર્યો હતો. ગત 5 માર્ચના રોજ ઘટેલી આ લોહિયાળ ઘટનામાં ગંભીર રીતે ઘવાયેલી મહિલાનું સારવાર દરમિયાન મોત નીપજતા સમગ્ર પંથકમાં અરેરાટી વ્યાપી ગઈ છે
શું હતી સમગ્ર ઘટના?
મૃતક મહિલા અને આરોપી ડાભી સેધાજી વચ્ચે અગાઉ પ્રેમ સંબંધ હતો. જોકે, કોઈ કારણોસર મહિલાએ આ સંબંધ હવે આગળ વધારવાની ના પાડી દીધી હતી અને સંબંધ તોડી નાખવાનો નિર્ણય કર્યો હતો. આ વાત પ્રેમી સેધાજીને મંજૂર નહોતી. જે વાતનો ખાર રાખીને આરોપી સતત મહિલા સાથે ઝઘડો કરતો હતો. મહિલા કડીમાં આવેલી એક ખાનગી કંપનીમાં નોકરી કરતી હતી. ગત 5 માર્ચના રોજ જ્યારે તે પોતાની ફરજ પૂરી કરીને ફેક્ટરીની બહાર નીકળી રહી હતી, ત્યારે જ રસ્તામાં ટાંપીને બેઠેલા સેધાજીએ તેને રોકી હતી.
જાહેરમાં છરીના ઘા ઝીંક્યા
ફેક્ટરીની બહાર મહિલા અને પ્રેમી વચ્ચે ફરીથી ઉગ્ર બોલાચાલી થઈ હતી. આરોપીએ ફરીથી સંબંધ રાખવા માટે દબાણ કર્યું હતું, પરંતુ મહિલાએ સ્પષ્ટ ઇનકાર કરતા આરોપીએ પોતાનું ભાન ગુમાવ્યું હતું. આરોપીએ પોતાની પાસે છુપાવેલી તીક્ષ્ણ છરી કાઢીને મહિલાના પેટના ભાગે ઉપરાઉપરી ઘા ઝીંકી દીધા હતા. લોહીલુહાણ હાલતમાં મહિલા જમીન પર ઢળી પડી હતી અને હુમલો કર્યા બાદ આરોપી ત્યાંથી ફરાર થઈ ગયો હતો.
સારવાર દરમિયાન મહિલાનું મોત
ઘટના બાદ આસપાસના લોકો એકઠા થઈ ગયા હતા અને ગંભીર રીતે ઘાયલ મહિલાને તાત્કાલિક સારવાર માટે ગાંધીનગર સિવિલ હોસ્પિટલ ખસેડવામાં આવી હતી. તબીબોએ તેને બચાવવા માટે સતત પ્રયાસો કર્યા હતા, પરંતુ છરીના ઘા એટલા ઊંડા હતા કે અનેક દિવસોની જિંદગી અને મોત વચ્ચેની લડાઈ બાદ મહિલાનું મોત નીપજ્યું હતું. આ ઘટનાને પગલે મૃતકના પરિવારજનોમાં શોકનું મોજું ફરી વળ્યું છે.
પુત્રીએ નોંધાવી પોલીસ ફરિયાદ
મૃતક મહિલાની પુત્રીએ પોતાની માતાની હત્યા કરનાર નરાધમ સેધાજી ખેંગારજી વિરુદ્ધ વડું પોલીસ મથકે કાયદેસરની ફરિયાદ નોંધાવી છે. પોલીસે આ મામલે હત્યાનો ગુનો નોંધી આરોપીને ઝડપી પાડવા માટે ચક્રો ગતિમાન કર્યા છે. એકતરફી પ્રેમ અને આવેશમાં આવીને કરવામાં આવેલી આ હત્યાએ ફરી એકવાર સમાજમાં વધતી જતી ગુનાખોરી અને માનસિકતા સામે સવાલો ઉભા કર્યા છે.