સુરતના ડીંડોલી વિસ્તારમાં ગત 16 ઓગસ્ટ, 2025ના રોજ થયેલી એક યુવકની હત્યાનો ભેદ આખરે ઉકેલાઈ ગયો છે. સુરત ક્રાઈમ બ્રાન્ચની ટીમે સઘન તપાસ બાદ બિહારના પટનાથી એક આરોપીને ઝડપી પાડ્યો છે અને તેની સામે કાયદેસરની કાર્યવાહી શરૂ કરી છે.
પોલીસના જણાવ્યા અનુસાર, મૃતક યુવકનું નામ સુભાષ દત્તાત્રેય લાટે હતું, જે સરદાર માર્કેટમાં આડતિયાનું કામ કરતો હતો.તેનો પરિચય આરોપી નવીન કુમાર પ્રમોદ યાદવ (ઉં. 20) સાથે થયો હતો. 15 ઓગસ્ટના રોજ સુભાષ, નવીન અને તેના કૌટુંબિક ભાઈ વિકાસ બબલુ યાદવ સાથે ફરવા નીકળ્યા હતા. ડીંડોલીમાં ખેતર નજીક કોઈ અગમ્ય કારણોસર થયેલા ઝઘડામાં નવીન અને વિકાસે સુભાષ પર ચપ્પુ વડે હુમલો કર્યો હતો. ગળા, છાતી અને પીઠના ભાગે ઘા મારી તેની નિર્દયતાપૂર્વક હત્યા કરવામાં આવી હતી.હત્યા બાદ બંને આરોપીઓ સુભાષના ખિસ્સામાંથી ₹15,000 રોકડા અને તેનો મોબાઈલ ફોન લૂંટીને નાસી ગયા હતા. તેઓ સુભાષની બાઇક પણ લઈ ગયા હતા અને પોતાના ઘરે મૂકીને ટ્રેન દ્વારા વતન બિહાર ભાગી ગયા હતા. પોલીસની તપાસ બાદ STF પટના, બિહારના સહયોગથી આરોપી નવીન કુમારને ઝડપી પાડવામાં આવ્યો છે. હાલ, પોલીસે તેનો કબજો ડીંડોલી પોલીસને સોંપવાની પ્રક્રિયા હાથ ધરી છે અને ફરાર આરોપી વિકાસ બબલુ યાદવને પકડવા માટે તપાસ ચાલુ છે.
રિપોર્ટર
સુનિલ ગાંજાવાલા
સુરત