હરિયાણા STFની અંબાલા ટીમે સમયસર મોટી કાર્યવાહી કરીને મોટી દુર્ઘટના ટાળી છે. ટીમે બરાડા પાસે એક મહત્ત્વનું ઓપરેશન પાર પાડીને ત્રણ યુવકોની ધરપકડ કરી છે. આ યુવકો કોઈ મોટી હોનારત સર્જવાના ઈરાદે વિસ્ફોટક સામગ્રી લઈ જઈ રહ્યા હતા. આરોપીઓ પાસેથી આશરે બે કિલોગ્રામ જેટલો વિસ્ફોટક જથ્થો મળી આવ્યો છે, જેના કારણે સુરક્ષા એજન્સીઓ સતર્ક થઈ ગઈ છે.
અંબાલા એસટીએફના ડીએસપી અમન અને પ્રભારી પ્રતીક કુમારને ગુપ્ત માહિતી મળી હતી કે, ત્રણ યુવકો શંકાસ્પદ વિસ્ફોટકો સાથે બરાડા તરફથી અંબાલા આવી રહ્યા છે. આ બાતમીના આધારે એસટીએફની ટીમે રસ્તામાં જ ઘેરાબંધી કરી બાઈક પર સવાર ત્રણેય યુવકોને દબોચી લીધા હતા. તેમની તપાસ દરમિયાન એક બેગમાંથી 1 કિલો 975 ગ્રામ વિસ્ફોટક સામગ્રી મળી આવી હતી.
પકડાયેલા આરોપીઓ હરિયાણા, રાજસ્થાન અને ઉત્તર પ્રદેશના રહેવાસી હોવાનું સામે આવ્યું છે. જેમાં અંબાલાના કંબાસી ગામનો એક યુવક, રાજસ્થાનના અજમેરનો એક અને ઉત્તર પ્રદેશના મેરઠનો એક યુવક સામેલ છે. પોલીસ હવે એ તપાસ કરી રહી છે કે આ યુવકોના તાર કયા સંગઠન સાથે જોડાયેલા છે અને તેઓ આ વિસ્ફોટકો ક્યાં લઈ જઈ રહ્યા હતા.
મામલાની ગંભીરતાને જોતા તાત્કાલિક બોમ્બ નિરોધક દસ્તાને બોલાવવામાં આવ્યો હતો. નિષ્ણાતોએ સ્થળ પર જ પહોંચીને આ વિસ્ફોટક સામગ્રીને સુરક્ષિત રીતે નિષ્ક્રિય કરી દીધી છે. હાલમાં એસટીએફ અને અન્ય ગુપ્તચર એજન્સીઓ આ ત્રણેય યુવકોની કડક પૂછપરછ કરી રહી છે જેથી મોટા ષડયંત્રનો ખુલાસો થઈ શકે.