મુખ્ય ચૂંટણી કમિશનર (સીઈસી) જ્ઞાનેશ કુમારના રાજીનામાની માંગને લઈને કોકરોચ જનતા પાર્ટી (CJP) દ્વારા અગાઉ દેશભરમાં અલગ-અલગ શહેરોમાં આંદોલન ચલાવવાની જાહેરાત કરવામાં આવી હતી, પરંતુ હવે તેમાં મોટો ફેરફાર કરીને મુંબઈથી સીધા દિલ્હી જવાનો નિર્ણય લેવામાં આવ્યો છે. CJP દ્વારા આગામી 10 ઓક્ટોબરે દિલ્હીના જંતર-મંતર પર એકત્ર થવાની અપીલ કરવામાં આવી છે.
આંદોલનની રણનીતિમાં ફેરફાર અને 10 ઓક્ટોબરે જંતર-મંતર પર દેખાવો
મુંબઈના શિવાજી પાર્કમાં પ્રદર્શન કર્યા બાદ CJPએ સીધા દિલ્હી કૂચ કરવાનું એલાન કર્યું છે. પહેલાં એવું નક્કી કરવામાં આવ્યું હતું કે દિલ્હી જતા પહેલા દેશના અન્ય શહેરોમાં પ્રદર્શન કરવામાં આવશે, પરંતુ નેશનલ વર્કિંગ કમિટીની બેઠકમાં આ યોજના બદલી નાખવામાં આવી. અભિજિત દીપકેએ સ્પષ્ટ કર્યું છે કે જો જ્ઞાનેશ કુમાર રાજીનામું નહીં આપે તો દેશભરના કોકરોચ દિલ્હી આવશે અને 10 ઓક્ટોબરે જંતર-મંતર પર વિરોધ પ્રદર્શન કરશે. આંદોલનના સહ સંયોજક આશુતોષ રાંકાએ જણાવ્યું કે આ નિર્ણય સર્વાનુમતે લેવામાં આવ્યો છે અને આ શાંતિપૂર્ણ આંદોલન મહાત્મા ગાંધીના માર્ગ પર ચાલશે.
‘જ્યાં રોકવામાં આવશે, તે જ સ્થાન જંતર-મંતર બની જશે’
દિલ્હી પોલીસ દ્વારા જંતર-મંતર પર ધરણા-પ્રદર્શન પર પ્રતિબંધ હોવાની કે અગાઉ લોકોને કસ્ટડીમાં લેવાની શંકાઓને ધ્યાનમાં રાખીને CJPએ આક્રમક વલણ અપનાવ્યું છે. સંગઠને જાહેરાત કરી છે કે જો પોલીસ અમને રોકશે, તો જે સ્થાને રોકવામાં આવશે તે જ સ્થળ ‘જંતર-મંતર’ બની જશે. સહ સંયોજક સૌરભ દાસે જણાવ્યું હતું કે જંતર-મંતર એ અસહમતિનું પ્રતીક છે અને જો પોલીસ તેને રોકવાનો પ્રયાસ કરશે તો લોકો જ્યાં ભેગા થશે અને જવાબદારી માંગશે તે દરેક સ્થળ જંતર-મંતર જ કહેવાશે.
ચૂંટણી પંચ અને લોકશાહી સામે ગંભીર આરોપો
CJPના નેતાઓએ આરોપ લગાવ્યો છે કે દેશનો આ એક અત્યંત મહત્ત્વનો સમય છે અને ચૂંટણી પંચ લોકશાહીને નષ્ટ કરવાની દિશામાં આગળ વધી રહ્યું છે. લાખો ભારતીયો કે જેના નામ વોટર લિસ્ટમાંથી હટાવી દેવામાં આવ્યા છે, તેમને ન્યાય અપાવવા માટે 10 ઓક્ટોબરે શાંતિપૂર્વક એકત્ર થઈને લોકશાહી પાછી મેળવવાની લડત ચલાવવામાં આવશે તેમ સંગઠને જણાવ્યું છે.