T20 ઇન્ટરનેશનલ ક્રિકેટમાં અત્યારે ભારતીય ટીમનો દબદબો સ્પષ્ટપણે જોવા મળી રહ્યો છે. ટીમ ઇન્ડિયાના નામે માત્ર ત્રણ ટી20 વર્લ્ડ કપ ટ્રોફી જ નથી, પરંતુ સતત બે વાર ચેમ્પિયન બનનારી તે વિશ્વની પ્રથમ ટીમ પણ બની છે. ભારતની આ શાનદાર સફળતાનું મુખ્ય પાસું વિશાળ સ્કોર ઊભો કરવાની તેની તાકાત છે. ભારતીય ટીમે આ ફોર્મેટમાં એક મોટો વિક્રમ સ્થાપિત કર્યો છે. ટી20 ઇન્ટરનેશનલમાં સૌથી વધુ વખત 200 રનથી વધુનો સ્કોર કરવાનો રેકોર્ડ હવે ભારતના નામે છે, જેમાં અન્ય ટીમો ભારતની સરખામણીએ ઘણી પાછળ રહી ગઈ છે.
T20માં ટીમ ઇન્ડિયાનું એકહથ્થુ શાસન: 50 વખત 200+ રનનો રેકોર્ડ
ટી20 વર્લ્ડ કપ 2026ની ફાઈનલ સહિત અત્યાર સુધીમાં ટીમ ઇન્ડિયાએ કુલ 50 વખત 200 કે તેથી વધુ રનનો આંકડો વટાવી દીધો છે. આ યાદીમાં બીજા સ્થાને સાઉથ આફ્રિકા છે, જેણે માત્ર 29 વાર આ સફળતા મેળવી છે. ત્યારબાદ ન્યૂઝીલેન્ડ 28 વખત 200 પ્લસ રન બનાવીને ત્રીજા ક્રમે છે. આ સિવાય ઇંગ્લેન્ડ અને વેસ્ટ ઇન્ડીઝ જેવી પાવરફુલ ટીમો પણ અત્યાર સુધી માત્ર 26-26 વાર જ આ સિદ્ધિ હાંસલ કરી શકી છે. આ આંકડાઓ જ સાબિત કરે છે કે ટી20 ફોર્મેટમાં ભારતનું વર્ચસ્વ કેટલું મજબૂત અને પ્રભાવશાળી છે.
વિશ્વમાં સૌથી વધુ ટી20 મેચ જીતવાનો ભારતનો રેકોર્ડ
માત્ર રનના મામલે જ નહીં, પરંતુ મેચ જીતવામાં પણ ભારત સૌથી આગળ છે. ભારતે અત્યાર સુધીમાં કુલ 187 ટી20 ઇન્ટરનેશનલ મેચ જીતી છે, જે વિશ્વમાં સૌથી વધુ છે. આ ઉપરાંત, ટી20માં 250થી વધુ રનનો સ્કોર બનાવવાનો રેકોર્ડ પણ સૌથી વધુ વાર ભારતના નામે જ છે.