વૈભવ સૂર્યવંશી હજી માત્ર 14 વર્ષનો છે, પરંતુ તેના બેટનો અવાજ અત્યારથી જ આખી દુનિયામાં ગુંજી રહ્યો છે. IPL 2025 દ્વારા દરેકનું ધ્યાન ખેંચ્યા પછી, આ યુવા ખેલાડી હવે અંડર-19 ક્રિકેટમાં ધમાલ મચાવી રહ્યો છે. ભારતીય U19 ટીમ હાલ દુબઈમાં ચાલી રહેલા અંડર-19 એશિયા કપમાં ભાગ લઈ રહી છે. ભારતની પ્રથમ મેચ યુએઈ (UAE) સામે હતી, જેને ટીમ ઇન્ડિયાએ 234 રનના વિશાળ માર્જિનથી જીતી લીધી હતી. ભારતની આ જીતમાં વૈભવ સૂર્યવંશીએ 171 રનની ધમાકેદાર ઇનિંગ્સ રમીને મુખ્ય ભૂમિકા ભજવી હતી.
સૂર્યવંશીનો તોફાની અંદાજ
વૈભવે પોતાની આ ઇનિંગ્સ દરમિયાન 95 બોલનો સામનો કર્યો, જેમાં 9 ચોગ્ગા અને 14 ગગનચુંબી છગ્ગા ફટકાર્યા. આ 14 છગ્ગા સાથે તેણે એક એવો રેકોર્ડ બનાવ્યો જે U19 ક્રિકેટના ઈતિહાસમાં આજ સુધી કોઈ બેટર બનાવી શક્યો ન હતો.
U19 ODIમાં 50 છગ્ગા મારનાર પ્રથમ ખેલાડી
U19 ODIમાં સૌથી વધુ છગ્ગા મારવાનો રેકોર્ડ વૈભવ સૂર્યવંશીએ પોતાના નામે કર્યો છે. આ મેચ પહેલા પણ વૈભવ સૂર્યવંશી આ યાદીમાં પ્રથમ સ્થાને હતો, પરંતુ આ 14 છગ્ગા સાથે તે યુથ વનડેમાં 50 છગ્ગા મારનાર વિશ્વનો પ્રથમ બેટર બની ગયો છે. વૈભવ સૂર્યવંશીએ અત્યાર સુધી U19 ODIમાં માત્ર 12 મેચ રમી છે, જેમાં તે 57 છગ્ગા ફટકારી ચૂક્યો છે. આ યાદીમાં બીજા સ્થાને ભારતના જ ઉન્મુક્ત ચંદ છે, જેણે 38 છગ્ગા માર્યા હતા.
વિરાટ કોહલીના રેકોર્ડ પર નજર
વૈભવ સૂર્યવંશીના નામે હવે U19 ODIમાં કુલ 727 રન નોંધાયેલા છે. તેની નજર હવે વિરાટ કોહલીનો રેકોર્ડ તોડવા પર હશે. વિરાટે પોતાની U19 કારકિર્દીમાં 28 મેચોમાં 978 રન બનાવ્યા હતા. વિરાટ કોહલી અને વૈભવ સૂર્યવંશી વચ્ચે હવે માત્ર 251 રનનો જ તફાવત રહી ગયો છે.