પાકિસ્તાનને ICC તરફથી વધુ એક મોટો ઝટકો પડ્યો છે. ICC T20 વર્લ્ડકપ 2026 માં ભારત-પાકિસ્તાન મેચને લઈને ચાલી રહેલા વિવાદ વચ્ચે ICCએ બાંગ્લાદેશ અને પાકિસ્તાન વચ્ચેના જોડાણની શરતો અંગે પોતાનું વલણ સ્પષ્ટ કર્યું છે. ICCએ જણાવ્યું છે કે આ ઘટના માટે બાંગ્લાદેશને કોઈપણ રીતે દંડ કરવામાં આવશે નહીં અને ICCના આવકનો તેનો વાજબી હિસ્સો મળતો રહેશેમીડિયા રિપોર્ટ મુજબ ICCએ આ નિર્ણય પોતાની રીતે લીધો હતો અને અન્ય કોઈ બોર્ડ તરફથી કોઈ દબાણ ન હતું. બાંગ્લાદેશ ભલે વર્તમાન વર્લ્ડકપમાંથી બહાર થઈ ગયું હોય, પરંતુ તેને કોઈ આર્થિક નુકસાન થશે નહીં.
વળતર તરીકે બાંગ્લાદેશને ટુર્નામેન્ટ આપવાનો વિચાર!
ICC એ પણ સ્વીકાર્યું કે ગયા વર્ષે બાંગ્લાદેશ વિમેન્સ T20 વર્લ્ડ કપનું આયોજન કરવાથી વંચિત રહ્યું હતું, કારણ કે દેશમાં થયેલા રમખાણોને કારણે ટુર્નામેન્ટ બાંગ્લાદેશથી દુબઈ ખસેડવામાં આવી હતી.આને ધ્યાનમાં રાખીને ICC હવે બાંગ્લાદેશને આગામી ચક્રમાં એક મોટી ટુર્નામેન્ટના યજમાન અધિકારો આપવાનું વિચારી રહ્યું છે. સૂત્રોના જણાવ્યા મુજબ બાંગ્લાદેશને અગાઉના નુકસાનની આંશિક ભરપાઈ કરવા માટે અંડર-19 વર્લ્ડકપ જેવી ICC ઈવેન્ટ આપવામાં આવી શકે છે.
ICCએ પાકિસ્તાનની આ માગણીઓ ફગાવી દીધી
બેઠક દરમિયાન બાંગ્લાદેશ અને પાકિસ્તાને એવી પણ માગણી કરી હતી કે ICC ભારતને પાકિસ્તાન સાથે દ્વિપક્ષીય ક્રિકેટ રમવા માટે કહે. પરંતુ ICCએ આ માગણીને સ્પષ્ટપણે નકારી કાઢી.
ICCએ કહ્યું છે કે દ્વિપક્ષીય સિરીઝ તેના અધિકારક્ષેત્રમાં આવતી નથી. આ જ કારણ છે કે તે વર્લ્ડ ટેસ્ટ ચેમ્પિયનશિપ જેવી ICC ટુર્નામેન્ટ દરમિયાન પણ આવા મામલાઓમાં દખલ કરતું નથી.
તેવી જ રીતે ભારત-પાકિસ્તાન-બાંગ્લાદેશ વચ્ચે ટ્રાઈ સિરીઝનું આયોજન કરવાનો પ્રસ્તાવ પણ રજૂ કરવામાં આવ્યો હતો, પરંતુ તેને પણ તે જ કારણોસર નકારી કાઢવામાં આવ્યો હતો.
ભારત તરફથી બાંગ્લાદેશ પ્રવાસની માગ પણ નકારી કાઢવામાં આવી
આ વર્ષે ભારતના બાંગ્લાદેશ પ્રવાસનો મુદ્દો પણ બેઠકમાં ઉઠાવવામાં આવ્યો હતો. ICC એ સ્પષ્ટ કર્યું હતું કે તેને કોઈ પણ દેશને બીજા દેશનો પ્રવાસ કરવા માટે ફરજ પાડવાનો કોઈ અધિકાર નથી. આ નિર્ણય સંપૂર્ણપણે સંબંધિત ક્રિકેટ બોર્ડ અને સરકારો પર નિર્ભર છે.
ત્યારબાદ ICCએ પાકિસ્તાનને અલ્ટીમેટમ આપ્યું
લાહોરમાં લાંબી બેઠક બાદ પાકિસ્તાને 15 ફેબ્રુઆરીએ ભારત સામેની મેચ અંગે તાત્કાલિક નિર્ણય લીધો ન હતો. પાકિસ્તાન ક્રિકેટ બોર્ડના વડા મોહસીન નકવીએ કહ્યું કે તેઓ આ મુદ્દે વડા પ્રધાન શાહબાઝ શરીફ સાથે સલાહ લેવા માગે છે.
જેના પગલે ICCએ પાકિસ્તાનને એક દિવસનો સમય આપ્યો છે. સૂત્રોના જણાવ્યા મુજબ ભારત-પાકિસ્તાન મેચ અંગે અંતિમ નિર્ણય ગમે ત્યારે આવી શકે છે. ICC તરફથી આજે સાંજે અથવા બુધવારે સવારે સત્તાવાર જાહેરાત થવાની સંભાવના છે.
ICCની સૌથી મોટી ચિંતા ભારત-પાકિસ્તાન મેચથી થતી આવક છે. આ મેચને વિશ્વ ક્રિકેટમાં સૌથી વધુ કમાણી કરનારી મેચ માનવામાં આવે છે. જો આ મેચ નહીં યોજાય, તો તે ફક્ત ICC ને જ નહીં પરંતુ તમામ સભ્ય બોર્ડની વાર્ષિક આવકને પણ અસર કરશે.