શહેરના વિદ્યાર્થીઓ અને નોકરિયાત વર્ગ દ્વારા ભરૂચમાં કસકથી કોલેજ રોડ પર સિટી બસ અને એસટી બસની સંખ્યા વધારવા માટે ભરૂચના ધારાસભ્ય અને કલેક્ટરને લેખિતમાં રજૂઆત કરવામાં આવી છે. સ્થાનિક આગેવાન યોગી પટેલની આગેવાની હેઠળ આ રજૂઆત કરવામાં આવી હતી, જેમાં જણાવવામાં આવ્યું હતું કે ભરૂચના ભોલાવ વિસ્તારમાં આવેલી સાત મુખ્ય કોલેજો, શૈક્ષણિક સંસ્થાઓ અને ટ્યુશન ક્લાસમાં અંકલેશ્વર સહિત આસપાસના વિસ્તારોમાંથી હજારોની સંખ્યામાં વિદ્યાર્થીઓ અભ્યાસ માટે આવે છે.
આ વિદ્યાર્થીઓ અને નોકરિયાત વર્ગને સમયસર પહોંચવામાં ઘણી મુશ્કેલીઓનો સામનો કરવો પડે છે. આ સમસ્યાના નિવારણ માટે સવાર, બપોર અને સાંજના સમયે પરિવહનની પૂરતી સુવિધા પૂરી પાડવાની માગણી કરવામાં આવી છે. રજૂઆતમાં ભરૂચ નગરપાલિકા સંચાલિત સિટી બસ અને ગુજરાત રાજ્ય પરિવહન વિભાગની એસટી બસ દ્વારા વિશેષ બસો શરૂ કરવા અને ખાસ કરીને સિટી બસનો રૂટ કસકથી કોલેજ રોડ સુધી વિસ્તારવાની માગણી કરવામાં આવી છે. આ પગલાંથી વિદ્યાર્થીઓ, નોકરિયાત વર્ગ અને સામાન્ય નાગરિકોને અવરજવરમાં મોટી રાહત અને સુવિધા મળશે. આશા છે કે આ રજૂઆતને ધ્યાનમાં લઈને સંબંધિત અધિકારીઓ તાત્કાલિક યોગ્ય કાર્યવાહી કરશે.