સુરત નાં પાંડેસરા વિસ્તારમાંથી એક ચોંકાવનારી ઘટના સામે આવી છે, જેનાથી સમગ્ર શહેરમાં ચકચાર મચી ગઈ છે. માત્ર 50 રૂપિયાના વ્યવહારના વિવાદમાં એક નિર્દોષ યુવાનનું મોત નીપજ્યું હતું અને બીજા એક યુવાનને ઇજા પહોંચી હતી. આ ઘટના 16 સપ્ટેમ્બરની રાત્રે બની હતી, જ્યારે મિત્રો વચ્ચે થયેલી નાના ઝઘડાએ લોહીલુહાણ સ્વરૂપ ધારણ કરી લીધું હતું.
પાંડેસરા પોલીસ સ્ટેશન વિસ્તારમાં રોકડિયા હનુમાન મંદિર પાસે લક્ષ્મી નગરમાં રહેતા 28 વર્ષીય ભગત સિંહ નરેન્દ્ર સિંહે તેમના મિત્ર બિટ્ટુ કાશીનાથ સિંહના જન્મદિવસની ઉજવણીમાં હાજરી આપી હતી. મિત્રોએ અલથાણની એક હોટલમાં પાર્ટીનું આયોજન કર્યું હતું. પાર્ટી પહેલા, તેઓ બધા પાંડેસરામાં તિરુપતિ પ્લાઝા પાસે ઉભા હતા. આ દરમિયાન, અનિલ રાજભરે બિટ્ટુ સિંહ પાસે પાર્ટીના ખર્ચ માટે અગાઉ આપેલા 50 રૂપિયા માંગ્યા. આ સરળ માંગણીથી બિટ્ટુ ગુસ્સે થઈ ગયો અને તેણે અનિલ સાથે દુર્વ્યવહાર કરવાનું શરૂ કર્યું. પરિસ્થિતિ મારપીટ સુધી પહોંચી ગઈ.આ વિવાદ ખતરનાક બની ગયો. એવો આરોપ છે કે બિટ્ટુ સિંહ અવધિયા અને તેના સાથી ચંદન કરુણાશંકર દુબેએ ગુસ્સામાં આવીને ભગત સિંહ અને અનિલ રાજભર પર છરી વડે હુમલો કર્યો હતો. ભગતસિંહ પર અનેક વાર છરીના ઘા કરવામાં આવ્યા હતા, જેના કારણે તેનું ઘટનાસ્થળે જ મોત થયું હતું. અનિલ રાજભરે ગંભીર રીતે ઘાયલ થયો હતો. આ ઘટનાથી વિસ્તારમાં ગભરાટ ફેલાયો હતો.મૃતક ભગત સિંહના ભાઈ નાગેન્દ્ર સિંહે પાંડેસરા પોલીસ સ્ટેશનમાં ફરિયાદ નોંધાવી હતી. પોલીસે 23 વર્ષીય બિટ્ટુ સિંહ અવધિયા અને ચંદન દુબેની ધરપકડ કરી હતી. તપાસમાં જાણવા મળ્યું કે આરોપી, ચંદન દુબે એક રીઢો ગુનેગાર છે અને તેની સામે લૂંટ અને હુમલાના ચાર અગાઉના કેસ નોંધાયેલા છે.આ ઘટના બાદ ભગતસિંહનો પરિવાર શોકમાં છે. તેની માતા, ભાઈ-બહેનો અને અન્ય સંબંધીઓ આ દુ:ખદ મૃત્યુથી ખૂબ જ દુઃખી છે. એક સામાન્ય ઝઘડાએ આખા પરિવારની ખુશી છીનવી લીધી. સ્થાનિક લોકો કહે છે કે આ ઘટનાએ સમાજને હચમચાવી નાખ્યો છે અને યુવાનો જે માર્ગ અપનાવી રહ્યા છે તેના પર પ્રશ્નો ઉભા કર્યા છે.
રિપોર્ટર
સુનિલ ગાંજાવાલા
સુરત