જ્યારે સમગ્ર દેશમાં કોમી વૈમનસ્ય ફેલાવવાનો પ્રયાસ થઈ રહ્યો છે, ત્યારે ભરૂચ જિલ્લાના વાગરા નગરે ધાર્મિક સૌહાર્દ અને ભાઈચારાનું એક ઉત્કૃષ્ટ ઉદાહરણ પૂરું પાડ્યું છે. ગણેશોત્સવના પવિત્ર તહેવાર દરમિયાન, હિન્દુ ભાઈઓએ એક મુસ્લિમ મહિલાના અંતિમ સંસ્કાર યાત્રા (જનાજા) ને સન્માન આપવા માટે ગણેશ પંડાલના માઇક અને સંગીત બંધ રાખીને સાચી માનવતાનો પરિચય આપ્યો છે.
આ ઘટના વાગરાના વાંટા વિસ્તારમાં બની હતી. એક મુસ્લિમ મહિલાનું અવસાન થતાં તેમના જનાજાને કબ્રસ્તાન તરફ લઈ જવામાં આવી રહ્યો હતો. આ જ માર્ગ પર હિન્દુ સમાજે ગણપતિની સ્થાપના કરી હતી અને પંડાલમાં ભજન-કીર્તન ચાલી રહ્યા હતા. જેવો જનાજો પંડાલ નજીક પહોંચ્યો, હિન્દુ સમાજના યુવાનોએ તત્કાળ સંગીત અને માઇક બંધ કરી દીધા હતા.
આટલું જ નહીં, તેઓ મંડપમાંથી બહાર નીકળીને શિસ્તબદ્ધ રીતે ઊભા રહ્યા અને શાંતિપૂર્ણ વાતાવરણમાં જનાજાને પસાર થવા દીધો. જ્યાં સુધી જનાજો સંપૂર્ણપણે પસાર ન થયો ત્યાં સુધી માઇક બંધ રાખવામાં આવ્યા હતા. આ સંવેદનશીલતા અને પરસ્પર સન્માનની ભાવનાની સર્વત્ર પ્રશંસા થઈ રહી છે.
વાગરા નગરમાં હિન્દુ અને મુસ્લિમ સમાજ વર્ષોથી એકતા અને સંપથી તહેવારોની ઉજવણી કરે છે. આ ઘટના ફરી એકવાર સાબિત કરે છે કે વાગરામાં કોમી ભાઈચારો આજે પણ અકબંધ છે. નફરતભર્યા આજના માહોલમાં વાગરાના આ ભાઈચારાની જ્યોત ખરેખર પ્રશંસાને પાત્ર છે અને દેશના અન્ય વિસ્તારો માટે એક શ્રેષ્ઠ ઉદાહરણ પૂરું પાડે છે.
આ ઘટના ભારતીય સંસ્કૃતિના “વસુધૈવ કુટુંબકમ્” ના આદર્શનું જીવંત ઉદાહરણ છે, જે દર્શાવે છે કે માનવતા અને પરસ્પર સન્માન કોઈ પણ ધર્મથી ઉપર છે. વાગરાના નાગરિકોએ સાબિત કરી દીધું છે કે ધર્મના નામે વિભાજનના પ્રયાસો સામે સૌહાર્દ અને સહકાર જ સાચો માર્ગ છે.