વડોદરામાં પકડાયેલા ડુપ્લીકેટ પીએસઆઇ મોબિન સોદાગરના કેસમાં પોલીસે વધુ તપાસ કરતા લોન કૌભાંડ પણ બહાર આવ્યું છે. જેથી પોલીસે તેના ભાઈની ધરપકડ કરી છે.
તાંદલજાના અલ કબીર બંગ્લોઝ ખાતે રહેતા મોબીન સોદાગરને થોડા સમય પહેલા એસ.ઓ.જી એ ઝડપી પાડી મહત્વની ફાઈલો તેમજ દસ્તાવેજો કબજે કર્યા હતા. ડુપ્લીકેટ પીએસઆઇ તરીકે રોફ ઝાડતા મોબીન પાસેથી એસઆઇટીના ડુપ્લીકેટ આઈકાર્ડ, પોલીસ યુનિફોર્મ, પોલીસ લખેલી કાર સહિતની ચીજો મળી આવી હતી. જમીનના કેસોમાં સમાધાનની ભૂમિકા ભજવતા મોબિન સામે વડોદરા બાદ ભરૂચમાં પણ ગુનો નોંધાયો હતો. જે કેસોની તપાસ ચાલી રહી છે.
દરમિયાનમાં વડોદરા એસ.ઓ.જી ની તપાસમાં ડુપ્લીકેટ પીએસઆઇના વડુ ખાતેના ટ્રસ્ટની વિગતો પણ બહાર આવી હતી. જે ટ્રસ્ટના તેણે હિસાબો પણ રજૂ કર્યા ન હતા તેમજ લોન ઉપર બે થી ત્રણ વાહનો લીધા હોવાની પણ વિગતો બહાર આવી હતી. જે પૈકી એક કાર વિકલાંગ વ્યક્તિના નામે લઈને વેચી દેવામાં આવી હતી. આ ઉપરાંત લોનના હપ્તા પણ ભરપાઈ કરતો ન હતો. વાહનોના લોન કૌભાંડમાં મોદીના ભાઈ મોહસીનનું પણ મદદગારીમાં નામ બહાર આવ્યું હતું. એક વાહન માટે તેણે બીજી વ્યક્તિ નો ફોટો દૂર કરી પોતાનો ફોટો લગાવીને લોન લીધી હોવાની વિગતો બહાર આવી હતી. જેથી એસ.ઓ.જી તેને પણ શોધી રહી હતી. પોલીસે તાંદલજાના મકાનમાંથી વોન્ટેડ મોહસીન સોદાગરને પણ ઝડપી પાડ્યો છે.