વડોદરા મ્યુનિસિપલ કોર્પોરેશનની ખોરાક શાખાની ટીમો દ્વારા શહેરના વિવિધ વિસ્તારોમાં રાબેતા મુજબ ખાદ્ય પદાર્થોની તપાસ અને કાર્યવાહી હાથ ધરવામાં આવી રહી છે. આ અંતર્ગત ગઈકાલે મેમણ કોલોની આર્યુવેદિક ત્રણ રસ્તા, મકરપુરા, દુમાડ ચોકડી, સમા–સાવલી રોડ અને અલકાપુરી વિસ્તારમાં લારી, દુકાન અને રેસ્ટોરન્ટ સહિત કુલ 20 યુનિટ ખાતે આકસ્મિક ચેકિંગ કરવામાં આવ્યું હતું. જેમાં 16 યુનિટમાં બેદરકારી અને નિયમભંગ નોંધાયો હતો.
નિયમોનું ઉલ્લંઘન કરનાર 8 યુનિટને શિડ્યૂલ ચાર મુજબ નોટિસ પાઠવવામાં આવી હતી. તપાસ દરમિયાન મળેલા 82 કિલોગ્રામ અખાદ્ય પદાર્થોના જથ્થાનો સ્થળ પર જ નાશ કરવામાં આવ્યો હતો. આ સાથે સિંગલ યુઝ પ્લાસ્ટિક મળી આવતા 3 કિલો પ્લાસ્ટિકનો જથ્થો પણ સ્થળ પર જ નષ્ટ કરાયો હતો. સિંગલ યુઝ પ્લાસ્ટિકના ઉપયોગ અને ગંદકી રાખવાના કેસમાં કુલ રૂ. 1.37 લાખનો દંડ ફટકારવામાં આવ્યો હતો.આ ઉપરાંત કીર્તિસ્તંભ અને આરવી દેસાઈ રોડ વિસ્તારમાં કોર્પોરેશનની મોબાઈલ ટેસ્ટિંગ વાન ફૂડ સેફટી ઓન વ્હીલ્સ દ્વારા 13 યુનિટમાંથી સેવ ઉસળ, મરચાં પાવડર, તેલ, ગ્રેવી, ચટણી વગેરેના કુલ 30 સેમ્પલની સ્થળ પર જ ચકાસણી કરવામાં આવી હતી. ચકાસણી દરમિયાન એક યુનિટ ખાતે વારંવાર તળેલું અને કાળું પડી ગયેલું તેલ મળી આવ્યું હતું, જેમાં ટી.પી.સી. (ટોટલ પોલર કમ્પાઉન્ડ્સ)નું પ્રમાણ વધુ હોવાથી 2 કિલો અખાદ્ય તેલનો જથ્થો સ્થળ પર જ નાશ કરાયો હતો.
શહેરના મેમણ કોલોની ખાતે સ્વીટની લારી પરથી જલેબી અને બુંદી, આયુર્વેદિક ત્રણ રસ્તા પરના ધ સ્પોટ ખાતેથી તેલ, સાહિલ કેટરર્સ ખાતેથી ચિકન અને બિરયાની, અલકાપુરી વિસ્તારમાં જય અંબે રેસ્ટોરન્ટ માંથી ચટણી, લોટ ,શાકભાજી, દુમાડ ચોકડી પરની ન્યુ ભેરુનાથ રાજસ્થાની હોટલમાંથી લોટ, મકરપુરા વિસ્તારની પી.કે. એન્ટરપ્રાઇઝ માંથી કેળા અને ડુંગળી સહિતના અખાદ્ય પદાર્થોના જથ્થાનો સ્થળ પર નાશ કરાયો હતો.