વડોદરાના ફતેગંજ વિસ્તારમાં પોલીસ અને અન્ય સંસ્થાઓ દ્વારા બાળકોની ભિક્ષાવૃત્તિ બંધ કરાવવાના ભાગરૂપે ચાલતી ઝુંબેશ બાદ આજે પહેલી વખત કોઈ બાળકના વાલી સામે પોલીસ કેસ કરવાનો કિસ્સો બન્યો છે.
બાળકોને ભિક્ષાવૃત્તિ બંધ કરાવવા માટે જિલ્લા કલેકટરના અધ્યક્ષ પદે મળેલી મિટિંગમાં ચાઈલ્ડ વેલ્ફેર કમિટી, એન્ટી હ્યુમન ટ્રાફિકિંગ યુનિટ, જિલ્લા બાળ સુરક્ષા એકમ, વડોદરા પોલીસની શી ટીમ જેવી સંસ્થાઓના પ્રતિનિધિઓ હાજર રહ્યા હતા. 40 દિવસથી 60 જેટલા બાળકોના વાલીઓનું કાઉન્સિલિંગ કરવામાં આવ્યું હતું.
ટાસ્ક ફોર્સ દ્વારા જુદા જુદા ટ્રાફિક સિગ્નલો ઉપર વોચ રાખી ફતેગંજ સર્કલ પાસે ભીખ માંગી રહેલા કેટલાક બાળકોને પકડવાનો પ્રયાસ કરવામાં આવ્યો હતો. પરંતુ એક મહિલાએ ઇશારો કરતા તમામ બાળકો વાહનો વચ્ચેથી ભાગી છુટ્યા હતા, જેથી બાળકોને કોઈ ઈજા ના થાય તે હેતુથી તેમને પકડવામાં આવ્યા ન હતા.
જોકે આ તબક્કે બાજવાની કેસરીબેન બે વર્ષની બાળકી સાથે પકડાઈ ગઈ હતી. જેથી તેની સામે બાળકો પાસે ભિક્ષાવૃત્તિ કરાવવા બદલ ફતેગંજ પોલીસ સ્ટેશનમાં ગુનો નોંધવામાં આવ્યો હતો. કેસરીબેનની અગાઉ ત્રણ વખત કાઉન્સિલિંગ કરવામાં આવ્યું હતું અને ચોથી વખત અટકાયત પણ કરવામાં આવી હતી. પરંતુ તેણે બાંયધરી આપતા છોડી મુકાઈ હતી.