વડોદરામાં ચારે બાજુએ ગેરકાયદે દબાવો ઠેર-ઠેર થઈ ગયા છે ત્યારે કારેલીબાગ બહુચરાજી રોડ પર વિશ્વામિત્રીના નાળા પાસે ગેરકાયદે કાચા શેડ બાંધીને ખાણી પીણી સહિત અન્યનો વેપાર ધંધો કરનારા પર દબાણ શાખાની ટીમ બુલડોઝર સાથે ત્રાટકતા નાસભાગના દ્રશ્યો વચ્ચે તંત્રનું બુલડોઝર ફરી વળીને તમામ 20 જેટલા શેડનો સફાયો કર્યો હતો.
શહેરના બહુચરાજી કારેલીબાગ રોડ પર પેટ્રોલ પંપની સામે ગેરકાયદે શેડ બાંધીને ખાણીપીણીની લારીઓમાં વેપાર ધંધો થતા વારંવાર ટ્રાફિકજામની સમસ્યા સર્જાયા કરે છે.
દરમિયાન દબાણ શાખાની ટીમ બુલડોઝર સાથે આ વિસ્તારમાં પહોંચી જતા ગેરકાયદે શેડ બાંધીને લારીઓ સહિત ગલ્લાઓ પર ખાણી પીણી અને ચા પાણી સહિત અન્ય 20 જેટલા ગેરકાયદે સ્ટોલ કેટલાય વખતથી ધમધમતા થયા હતા. પરિણામે સવારથી જ ટ્રાફિક જામની સમસ્યા રોજિંદી બની હતી. દબાણ શાખાની ટીમ બુલડોઝર સાથે આ વિસ્તારમાં પહોંચી જતા દબાણ કરનારાઓમાં ભાગદોડ મચી હતી. દરમિયાન પાલિકાનો બુલડોઝર તમામ 20 જેટલા ગેરકાયદે બાંધવામાં આવેલા શેડ પર ફરી વળતા તમામ શેડ તોડી પાડવામાં આવ્યા હતા.