બ્રિટનના વેસ્ટ મિડલેન્ડ્સમાં ભારતીય મૂળની યુવતી સાથે દુષ્કર્મ ની ઘટનાએ વિસ્તારમાં હંગામો મચાવી દીધો છે. પોલીસે આ હુમલાને નફરતનો ગુનો ગણાવ્યો છે. શનિવારે સાંજે વોલ્સોલના પાર્ક હોલ વિસ્તારમાં આ ઘટના બની હતી. જ્યારે પોલીસને સાંજે લગભગ 7:15 વાગ્યે શેરીમાં રડતી એક યુવતીના અહેવાલ મળ્યા હતા. પોલીસ પહોંચ્યા પછી, પોલીસે શોધી કાઢ્યું કે મહિલા પર નજીકના ઘરમાં એક અજાણી વ્યક્તિએ હુમલો કર્યો છે.
પીડિત મહિલા 20 વર્ષની હોવાનું કહેવાય છે. આ ઘટનાએ માત્ર સ્થાનિક ભારતીય સમુદાયને જ નહીં પરંતુ સમગ્ર વિસ્તારને હચમચાવી નાખ્યો છે. તપાસ અધિકારીઓના જણાવ્યા અનુસાર, શંકાસ્પદ શ્વેત છે અને તેની ઉંમર લગભગ 30 વર્ષ છે. તેના વાળ ટૂંકા છે અને તેણે કાળા કપડાં પહેર્યા હતા. વેસ્ટ મિડલેન્ડ્સ પોલીસે હુમલાખોરના સીસીટીવી ફૂટેજ જાહેર કર્યા છે અને લોકોને વિનંતી કરી છે કે જો તેમની પાસે કોઈ માહિતી હોય તો તાત્કાલિક પોલીસનો સંપર્ક કરે.
વેસ્ટ મિડલેન્ડ્સ પોલીસ ડિટેક્ટીવ સુપરિન્ટેન્ડેન્ટ રોનન ટાયરે આ ઘટનાને ભયાનક અને અમાનવીય હુમલો ગણાવ્યો. તેમણે કહ્યું, અમારી ટીમો પુરાવા એકઠા કરી રહી છે, સાક્ષીઓ સાથે વાત કરી રહી છે અને શંકાસ્પદની ઓળખ સ્થાપિત કરવા માટે કામ કરી રહી છે. અમારું એકમાત્ર ધ્યેય શકમંદને શક્ય તેટલી વહેલી તકે ધરપકડ કરવાનો છે. તેમણે જાહેર સહાય માટે અપીલ કરતા કહ્યું કે, જો કોઈએ તે સમયે વિસ્તારમાં કોઈ શંકાસ્પદ વ્યક્તિને જોયો હોય અથવા તેની પાસે ડેશકેમ અથવા સીસીટીવી ફૂટેજ હોય, તો તે એક મહત્વપૂર્ણ સંકેત સાબિત થઈ શકે છે.