બોલીવુડ અભિનેત્રી શિલ્પા શિરોડકરની કાર મુંબઈમાં એક બસ સાથે અથડાઈ હતી. અભિનેત્રીએ ઇન્સ્ટાગ્રામ પર પોતાની ક્ષતિગ્રસ્ત કારની ભયાનક તસવીરો શેર કરી હતી અને બસ કંપનીએ આ ઘટનાની કોઈ જવાબદારી લેવાનો ઇનકાર કર્યો હતો તે અંગે નિરાશા વ્યક્ત કરી હતી.
શિલ્પાએ આ મામલે ફરિયાદ નોંધવા અને મદદ કરવા બદલ મુંબઈ પોલીસનો પણ આભાર માન્યો હતો. શિલ્પાએ એમ પણ કહ્યું હતું કે આ અકસ્માતમાં તેની ટીમના કોઈ સભ્યને ઈજા થઈ નથી.
શિલ્પા શિરોડકરે અકસ્માતને લઈ કરી ચોંકાવનારી પોસ્ટ
શિલ્પા શિરોડકરે પોતાની ઇન્સ્ટાગ્રામ સ્ટોરી પર લખ્યું કે, આજે સિટીફ્લો બસે મારી કારને ટક્કર મારી અને મુંબઈમાં ઓફિસના પ્રતિનિધિઓ યોગેશ કદમ અને વિલાસ માનકોટે મને કહી રહ્યા છે કે આ તેમની કંપનીની જવાબદારી નથી ડ્રાઇવરની જવાબદારી છે. આ લોકો કેટલા નિર્દય છે? ડ્રાઇવર કેટલી કમાણી કરી શકે છે! તેમણે આગળ લખ્યું હતું કે, મુંબઈ પોલીસનો આભાર, તેમણે મને કોઈપણ મુશ્કેલી વિના પોલીસ ફરિયાદ નોંધાવવામાં મદદ કરી. પરંતુ કંપની આ ઘટના માટે કોઈપણ જવાબદારી લેવાનો ઇનકાર કરી રહી છે . આ મામલે મારી સાથે જોડાવા બદલ આભાર. સદભાગ્યે મારો સ્ટાફ ઠીક છે અને તેને કોઈ ઈજા થઈ નથી પરંતુ કંઈ પણ થઈ શક્યું હોત.
શિલ્પાએ પોસ્ટ કરેલી તસવીરમાં તેની કાર પાછળથી ક્ષતિગ્રસ્ત દેખાઈ રહી છે તસવીરમાં તૂટેલા કાચ સાથે એક મોટો ખાડો સ્પષ્ટપણે દેખાય છે. તેણે બસની નંબર પ્લેટનો ફોટો અને બીજી એક તસવીર પણ પોસ્ટ કરી છે જેમાં બસ પર ‘સિટીફ્લો’ સ્પષ્ટપણે લખેલું છે. ત્યાર બાદ અભિનેત્રીએ તેના મિત્રો સાથે ખુશ સેલ્ફી પોસ્ટ કરી હતી જેનાથી સ્પષ્ટ થયું કે તેને કોઈ ઈજા થઈ નથી.
વર્ક ફ્રન્ટ વિશે વાત કરીએ તો, શિલ્પા શિરોડકર બહુપ્રતિક્ષિત અખિલ ભારતીય સુપરનેચરલ થ્રિલર ‘જટાધારા’માં જોવા મળશે. આ ફિલ્મ દ્વારા તે લાંબા સમય બાદ પડદા પર વાપસી કરશે. ‘જટાધારા’ અનંત પદ્મનાભ સ્વામી મંદિર અને તેના છુપાયેલા રહસ્યમય કાવતરાની આસપાસ ફરે છે. આ સિવાય તે વેબ સિરીઝ ‘શંકર -ધ રિવોલ્યુશનરી મેન’માં જોવા મળશે.