કર્ણાટકના હાસન જિલ્લામાંથી ગણેશ ઉત્સવ દરમિયાન એક હૃદયદ્રાવક સમાચાર આવ્યા છે. અહીં મોસાલેહોસલ્લી ગામ નજીક નેશનલ હાઇવે-373 પર શુક્રવારે મોડી રાત્રે એક ફુલ સ્પીડમાં આવેલી ટ્રક ડિવાઇડર તોડીને ગણેશ વિસર્જન શોભાયાત્રામાં ઘૂસી ગઈ. આ અચાનક થયેલા અકસ્માતમાં 8 લોકોના ઘટનાસ્થળે જ મોત થયા હતા અને 25 થી વધુ લોકો ગંભીર રીતે ઘાયલ થયા હતા.
પોલીસે જણાવ્યું હતું કે અકસ્માતમાં 8 લોકોના મોતની પુષ્ટિ થઈ છે. આમાંથી 5 લોકોના ઘટનાસ્થળે જ મોત થયા હતા. જ્યારે 3 લોકોના સારવાર દરમિયાન હોસ્પિટલમાં મોત થયા હતા. ગંભીર રીતે ઘાયલ 8 લોકો સારવાર હેઠળ છે અને 12 અન્ય ઘાયલ પણ થયા છે.કર્ણાટકના મુખ્યમંત્રી સિદ્ધારમૈયાએ હાસનમાં ગણેશ વિસર્જન શોભાયાત્રા દરમિયાન થયેલા દુ:ખદ અકસ્માત પર ઊંડી સંવેદના વ્યક્ત કરી છે. તેમણે કહ્યું કે ટ્રકની ટક્કરમાં ઘણા લોકોના મોત અને 20 થી વધુ લોકોના ઘાયલ થવાના સમાચારથી તેઓ ખૂબ જ દુઃખી છે. મુખ્યમંત્રીએ X પરની પોસ્ટમાં લખ્યું, “હું પ્રાર્થના કરું છું કે મૃતકોના આત્માને શાંતિ મળે અને ઘાયલો જલદી સ્વસ્થ થાય.” તેમણે કહ્યું કે આ ખૂબ જ પીડાદાયક ક્ષણ છે અને આ મુશ્કેલ સમયમાં, આપણે બધાએ અસરગ્રસ્ત પરિવારો સાથે ઉભા રહેવું જોઈએ.
મુખ્યમંત્રીએ જાહેરાત કરી કે રાજ્ય સરકાર મૃતકોના પરિવારોને 5 લાખ રૂપિયાનું વળતર આપશે. આ ઉપરાંત, અકસ્માતમાં ઘાયલ થયેલા લોકોની સારવારનો સંપૂર્ણ ખર્ચ પણ સરકાર ઉઠાવશે. સિદ્ધારમૈયાએ પોતાની પોસ્ટમાં આગળ કહ્યું, “આ ખૂબ જ પીડાદાયક ક્ષણ છે. ચાલો આપણે બધા આ અકસ્માતમાં પીડિતોના પરિવારો સાથે ઉભા રહીએ અને તેમને ટેકો આપીએ.”